Malumki, italiyalik murabbiylarning jahon futbolida tutgan o'rni nihoyatda katta. Arrigo Sakki, Marchello Lippi, Fabio Kapello, Jovanni Trapattoni - bularning barchasi futbolda o'z izlarini qoldirishgan. FIFA talqiniga ko'ra, o'tgan yil jahonning "Eng yaxshi murabbiyi" deb topilgan Klaudio Raneri ham erishgan sovrinlari tufayli muxlislar qalbidan o'rin egallagan.

Raneri ayni paytda Franciyaning "Nant" klubini boshqarmoqda. Mutaxassis yaqinda FIFA rasmiy saytiga intervyu berib, yosh murabbiylardan Antoni Konte bilan Massimiliano Allegrini maqtab o'tdi.

- Malumki, siz o'tgan yil "Eng yaxshi murabbiy" deb topilgandingiz. Bu mukofot siz uchun nimani anglatadi?
- FIFAning nufuzli sovrini menga "Lester" bilan Angliya chempioni bo'lganim uchun berilganini bilaman. Bu sovrin men uchun juda qadrli, chunki u barchaga ham nasib etavermaydi.

- Bu yil eng yaxshi bo'lish uchun Zidan, Konte va Allegri o'zaro kurash olib borishadi. Sizningcha, yutuq kimga nasib etadi?
- Men bu o'rinda bir kishini alohida ajratib ko'rsata olmayman. Ularning uchalasi ham yaxshi murabbiylar. Eng yaxshi bo'lishga davogarlardan ikki nafari italiyalik va bu meni xursand qiladi. Men Konte va Allegrini juda hurmat qilaman. Ular katta yutuqlarni qo'lga kiritishdi va hamon ularning jamoasi yaxshi o'yin ko'rsatishda davom etmoqda. Bu murabbiylar yosh va ularning g'alabalarga bo'lgan tashnasi juda yuqori.

- Italiyalik murabbiylar doim eng zo'rlaridan biri bo'lib kelishgan. Buning sababi nmada?
- Menimcha, hamma gap italyan futbol maktabida bo'lsa kerak. Juda ko'pchilik Italiyaga kelib ishlashni xohlaydi, chunki Italiyaga kelgan odam tartin-intizom nimaligini o'rganadi. Qolaversa, ichki chempionat ham kuchli. Xoh murabbiy, xoh futbolchi uchun Italiya chempionati ko'p narsa beradi.

- Qaysi italiyalik murabbiy futbolga eng katta tasir o'tkazgan deb o'ylaysiz?
- Menimcha, bu Arrigo Sakki bo'lsa kerak. Uning Italiyada tasir doirasi juda katta bo'lgan. Sakkining "Milan"i qanday o'ynaganini ko'pchilik bilsa kerak. Muxlislar italyan futboli deganda himoyaviy o'yinni tushunishadi, ammo Sakki bu qarashni o'zgartira olgan.

Klaudio Raneri: "Men Konte va Allegrini juda hurmat qilaman"