– Ўйиндан кейинги фикрларингизни билдириб ўтсангиз.
– Афсуски, жудаям яхши ўйнаб, мағлубиятга учрадик. Бунга сабаб сифатида битта-иккита индивидуал хатоларни кўрсатишим мумкин. Лекин жамоавий футбол ҳақида гапирадиган бўлсам, йигитлардан жудаям хурсанд бўлдим. Мени қувонтираётган нарса – ўйиндан ўйинга ривожланаётганимиз. Ҳар қанақа ҳолатда, хусусан, маҳоратли, тажрибаси юқори ва олдига катта мақсадлар қўйган жамоаларга қарши ҳам ўзимиз хоҳлаган ўйинни кўрсата олаётганликлари ва сўнгги дақиқаларгача курашаётганликлари мени хурсанд қилади. Бугун таъкидлаб ўтиш керак бўлган жиҳат шуки, ҳар қандай босим ҳолатида йигитлар ўзларини эркин ҳис қилишди. Босимдан чиқиб кетиш учун – мураббийлар тилида айтганда "қалтис вазиятлар"дан чиқиб кетишлари мени жудаям хурсанд қилди. Бу нафақат тактик ва техник томондан, балки психологик жиҳатдан ҳам ўсаётганимизни кўрсатади.
– Бугун рақиб таркиб жиҳатдан жудаям кучли эди ва ўзингиз айтиб ўтганингиздек, олдига Суперлигага чиқиш вазифасини қўйган жамоа. Бунақанги таркиб ва кучли ижрочиларга эга рақибнинг, айниқса, биринчи бўлимда бу қадар чуқур ҳимояга ётиши сизни ҳайрон қолдирмадими? Яъни, жамоангиз позицион ҳужум уюштираётганда майдон марказига ҳам чиқмай, жудаям чуқур ҳимояланди. Бу нарса ҳайрон қолдирмадими, сиз учун кутилмаган ҳолат бўлмадими?
– Йўқ, мен учун кутилмаган ҳолат бўлмади. Агарда ўйиннинг бошидан эътибор берадиган бўлсангиз, рақиб дастлаб босим қилишга ҳаракат қилди. Айтиб ўтганимдек, тезкор қарорлар ҳисобига биз босимдан чиқиб кетганимиз учун, рақиб бўшлиқларни ёпиш мақсадида зичроқ ўйнашга ҳаракат қилди. Агар бошида рақибнинг босимидан чиқиб, ўз ўйинимизни шакллантириб олмаганимизда, албатта, рақиб юқорироқда ўйнаб, кўпроқ босим қилиши мумкин эди. Биз буни билардик. Одатда кучли жамоаларга қарши кўпроқ ҳимоявий футбол таклиф қилардик, бугун эса позицион ҳужумларда кучли жамоаларга қарши ўзимизни қанчалик яхши томондан кўрсата олишимиз биз учун жуда қизиқ эди. Мен ўйлайманки, ҳар қандай рақиб билан ўйнаса бўлади. Буни йигитлар биринчи бўлимда кўрсатишди. Иккинчи бўлимда қаердадир чарчоқ бўлиши мумкин ёки бир-иккита вазиятларда тактик ва индивидуал хатоларни ҳам кузатдик, лекин, айниқса, биринчи бўлимда йигитлар баракалла, жудаям юқори савиядаги футбол кўрсатишди. Саволингизга аниқ жавоб берадиган бўлсам, рақибни зичроқ ҳимояланишга биз ўзимиз мажбур қилдик, деб ўйлайман.
– Иккинчи саволим. Ҳозир Про лиганинг кўплаб ўйинларини кузатиб боряпман ва иккита жамоа эътиборимни тортяпти. Иккиси ҳам ёш футболчилардан иборат: биринчиси – сизнинг жамоангиз, иккинчиси – "Ғазалкент". Ҳар иккала жамоанинг ўйинлари ва натижаларига назар солсангиз, аксарият ўйинларида рақибдан яхшироқ ўйнаяпти, тўпни кўпроқ назорат қиляпти, ўйинда рақибга нисбатан устунлик қиляпти, аммо натижага келганда оқсаяпти. Масалан, баъзи жамоалар ўйинда тўлиқ устунлик қилмаса ҳам, яхши натижа қайд этиб кетяпти. Сизнинг жамоангизда ва "Ғазалкент"да эса ўйинда устунлик қилиб, тўпни назорат қилса-да, натижа кўрсатишда бироз оқсаш кузатиляпти. Бу айнан нима билан боғлиқ деб ўйлайсиз?
– Бу, биринчи навбатда, маҳорат ва тажриба билан боғлиқ. Чунки бугун кўрган бўлсангиз, биз рақибдан кўра анча кўпроқ хавфли вазиятлар ярата олдик. Лекин сўнгги зарбаларда, қаердадир йигитлар тўпни ўзида узоқ ушлаб қоляпти, зарба беришга яхшироқ вазият қидириб, мураккаброқ ҳолатга кириб кетяпти. Бу, албатта, маҳоратнинг етишмаслигидан. Ҳозирги замон футболида шуни кузатяпмизки, кўп жамоалар рақибга тўпни бериб қўйган ҳолда тезкор ҳужумларга ўтишмоқда. Про лига даражасида, барча жамоаларга ҳурматни сақлаган ҳолда шуни айтишим мумкинки, комбинацион футболдан кўра очиқроқ, вертикал ва яккакурашларга асосланган футбол ўйналади. Шунинг учун тўпни кўпроқ назорат қилган жамоа яккакурашларда ютқазиб қўймоқда. Ҳал қилувчи ҳолатларда ўйин тизгинини қўлдан чиқариб юбориш оқибатида шундай муаммолар келиб чиқяпти. Умуман олганда, айтганингиздек, бу тажриба орқали келадиган нарса. Бу менинг фикрим.
– Бугун кўрдикки, баъзи бир вазиятларда ҳакамларга нисбатан сиз томондан ҳам қатъий эътирозлар бўлди. Умумий олганда, бугун ҳакамларнинг қарорларини қандай баҳолайсиз?
– Энди бу бироз эмоцияларга берилганимиз сабабли бўлди. Бундан олдинги ўйинларимизни ҳам кузатган бўлсангиз, негадир кўп учрашувларда ҳакамлар... тўғри, инсонийлик фактори деймиз, ҳакамнинг ҳам хато қилишга ҳаққи бор, лекин ортда қолган турларни кузатадиган бўлсак, ҳакамларнинг жуда кўп қарорлари ва хатолари бизнинг зараримизга ишламоқда. Балки шу нарса ҳам қаердадир ҳиссиётларга сабаб бўлгандир. Ўйин бошида ҳакам томонидан кўп маротаба чалинган ҳуштаклар ҳам бизга қарши бўлди. Биз ўйинга юқори суръат таклиф қилдик, бу ерда эса ҳар бир чалинган ҳуштак ўйинимизнинг темпини тушириб юбораётгани учун бироз эътироз билдирдик. Лекин, умумий олганда, мен ўйлайманки, бугун ҳакамлар яққол катта хатога йўл қўйишмади.
