Ўйиндан сўнг меҳмонлар бош мураббийи Жамолиддин Раҳматуллаев фикрларини билдирди.
"Бекобод жамоасини анчадан бери соғиниб кутилган футбол байрами билан табриклайман. Ўйиндан олдин шунга яраша байрамона кайфият бўлди. Беллашув ҳам шиддатли кўриниш олди деб ўйлайман. Икки жамоа ҳам максимум ҳаракат қилди. Икки хил тайм гувоҳига айландик. Рақиб кўпроқ иккинчи бўлимда босим уюштирди, тўпни назорат қилишга интилди. Биз ҳимояда тезкор ҳужумлар билан рақиб дарвозасига йўл топишга ҳаракат қилдик. Таркибимиздаги йигитлар ёш лекин кўзи ёниб турибди. Бугун улар биринчи турдаги каби юракдан тўп тепишди. Футболчиларимга катта раҳмат айтаман",- дейди Жамолиддин Раҳматуллаев.
- Дарвоза томон белгиланган пенальти ҳақида нима дея оласиз?
- У вазиятни билмадим, кўра олганим йўқ. Видео такрорни ҳам кузатмадим. Биринчи турда ҳам шундай вазият юзага келганди.
- Жамоадаги қайси футболчиларни алоҳида эътироф этиш мумкин?
- Йигитлар ҳақиқий жамоавий ўйин кўрсатишди. "Металлург" таркибида тажрибали футболчилар кўп эди. Шунга қарамай якка курашларда ҳам, руҳий томонлама ҳам қолишишмади. Фақат раҳмат айтиш мумкин.
- Ҳужумчи Эммануэль Эмонкпаир терма жамоа ихтиёрида. Унинг ўрни қанчалик билинди?
- Бу йигит ҳали 16 ёшда. Унинг Про лига даражасида қанчалик ўйнай олишини билмаймиз. Асилбек Алиев ундан анча маҳоратли, Осиё Кубоги, Жаҳон чемпионатини босиб ўтган футболчи. Алиев олдинда энг зўри бўлиб турибди.
- "Республика ФА" жамоасининг Про лигада иштирок этишидан асосий мақсади нима?
- Мақсадимиз футболчиларни катта футболга тайёрлаш. Жамоамизни 2007-2008 йилда туғилган футболчилар ташкил қилади. Олдимизда 2027 йилда U-20 Жаҳон чемпионати бор. Терма жамоамизнинг асосий футболчилари ўз жамоасида. Биз уларга тегмаган ҳолда ўйин амалиёти камроқ, иқтидори бор лекин кўринмаётган академиялардаги футболчиларни жалб қилдик. U-20 терма жамоамизга 20 ёки 30 та эмас, 50 та футболчиларни тайёрлаб рақобатни оширишни мақсад қилдик.
