Учрашувдан сўнг жамоа етакчиларидан бири Анвар Ҳожимирзаев янги мавсумга тайёргарлик, йиғинлар ва миллий терма жамоадаги фаолияти ҳақида фикрлари билан ўртоқлашди.
— Йиғинларда барчага бир таймдан имконият берилмоқда. Чемпионат аввалида ҳамма жамоалар деярли бир хил ҳолатда бўлади. Ўзимизга керакли ўйин амалиётини олдик. Мавсумга тайёргарликни бошлаб юборганмиз. 6 февраль куни Дубайга иккинчи йиғин учун йўл олишимиз режалаштирилган. Ўйлайманки, Суперлига стартига тайёр бўламиз, — дейди Анвар Ҳожимирзаев.
— ЦСКА билан ўйинда камбэк амалга оширилди. Буни кутганмидинглар? Чунки икки жамоа даражасида фарқ катта...
— Ўша вақтда терма жамоа билан йиғинда эдик. Албатта, ўйинни кўриб хурсанд бўлдик. Йигитлар катта меҳнат қилишган.
— Олдинда "Зенит"га қарши ўйин кутмоқда...
— Бу ўйинга ҳам яхши тайёргарлик кўриб, мухлисларни хурсанд қилишга ҳаракат қиламиз.
— Ўзбекистон миллий терма жамоасидан қайтдингиз. Хитой билан уч бўлимли ўйинда дуранг қайд этилди, "Урарту" устидан ғалабага эришилди. Аввалги йиғинлардан қанчалик фарқ кўрдингиз?
— Ўзига яраша қизиқарли йиғин бўлди. Машғулот жараёнлари ҳам жуда қизиқ ўтди. Иккита ўйин ўтказдик. Охирги учрашувда 4:2 ҳисобида ғалаба қозондик. Ҳар бир футболчига бир таймдан имконият берилди. Умид қиламизки, яна терма жамоага чақирилиб, ўз устида ишлашда давом этамиз.
— Каннаваро борасидаги хулосалар қандай?
— Ажойиб инсон. Машғулотлари қизиқ ва талабчан. Европача услуб десак ҳам бўлади. Бир сўз билан айтганда, ўз ишининг устаси.
