Uchrashuvdan so'ng jamoa yetakchilaridan biri Anvar Hojimirzaev yangi mavsumga tayyorgarlik, yig'inlar va milliy terma jamoadagi faoliyati haqida fikrlari bilan o'rtoqlashdi.
- Yig'inlarda barchaga bir taymdan imkoniyat berilmoqda. Chempionat avvalida hamma jamoalar deyarli bir xil holatda bo'ladi. O'zimizga kerakli o'yin amaliyotini oldik. Mavsumga tayyorgarlikni boshlab yuborganmiz. 6 fevral kuni Dubayga ikkinchi yig'in uchun yo'l olishimiz rejalashtirilgan. O'ylaymanki, Superliga startiga tayyor bo'lamiz, - deydi Anvar Hojimirzaev.
- SSKA bilan o'yinda kambek amalga oshirildi. Buni kutganmidinglar? Chunki ikki jamoa darajasida farq katta...
- O'sha vaqtda terma jamoa bilan yig'inda edik. Albatta, o'yinni ko'rib xursand bo'ldik. Yigitlar katta mehnat qilishgan.
- Oldinda "Zenit"ga qarshi o'yin kutmoqda...
- Bu o'yinga ham yaxshi tayyorgarlik ko'rib, muxlislarni xursand qilishga harakat qilamiz.
- O'zbekiston milliy terma jamoasidan qaytdingiz. Xitoy bilan uch bo'limli o'yinda durang qayd etildi, "Urartu" ustidan g'alabaga erishildi. Avvalgi yig'inlardan qanchalik farq ko'rdingiz?
- O'ziga yarasha qiziqarli yig'in bo'ldi. Mashg'ulot jarayonlari ham juda qiziq o'tdi. Ikkita o'yin o'tkazdik. Oxirgi uchrashuvda 4:2 hisobida g'alaba qozondik. Har bir futbolchiga bir taymdan imkoniyat berildi. Umid qilamizki, yana terma jamoaga chaqirilib, o'z ustida ishlashda davom etamiz.
- Kannavaro borasidagi xulosalar qanday?
- Ajoyib inson. Mashg'ulotlari qiziq va talabchan. Yevropacha uslub desak ham bo'ladi. Bir so'z bilan aytganda, o'z ishining ustasi.
