Matbuot anjumanining birinchi qismida qatnashgan “Fulad” bosh murabbiyi safarda o'ynash osonroq, bosimni kam his qilamiz, lekin uyda to'p tepganda muxlislarning bosimi yuqori bo'ladi dedi. Shunga qaramay, eronliklar ustozi uyda o'ynash baribir boshqacha ekanligini aytib o'tdi.

Uchrashuvlar protokoliga nazar tashlaydigan bo'lsak, 2-turdagi “Fulad” – “Al Fath” o'yiniga 37 mingdan ko'p muxlis tushibdi. 3-turdan o'rin olgan “Bunyodkor” – “Fulad” bahsiga esa hatto 2 mingta odam kelmadi. “Al Jaish” bilan o'yinga birmuncha ko'proq ishqiboz kelgandi. Lekin “Bunyodkor”ning mag'lubiyati sabab bo'lib, bu gal o'yinga yanayam kamchilik tashrif buyurdi.

Natijada o'sha kuni stadionda OCHL muhiti hukm surmadi. Stadionga odam kirmadi hisob. Bo'lmasa, Osiyo chempionlar ligasi-ya! Oliy liga yoki shunchaki o'rtoqlik uchrashuvi bo'lganida ham boshqa gap edi. “Fulad”ga qoyil, jamoa o'zining har bir uy uchrashuvida 35-40 ming muxlisni taklif eta olyapti. Ammo bizda hatto 8 minglik “Jar”ni to'ldirish ham muammo. Nahotki, muxlislarning shunchalik futboldan ko'ngli qolgan bo'lsa?

Matbuot anjumanining ikkinchi qismida ishtirok etgan Mirjalol Qosimov gapni avvalgi bahsdagi xatolar takrorlanganini aytish bilan boshladi. Bunda murabbiy “Al Jaish”ga qarshi kechgan bahsni nazarda tutdi. Aslini olganda, “Bunyodkor” “Qizilqum” bilan kechgan bellashuvda ham zo'r namoyish etmadi, lekin yutdi. Futbolda o'zi shunaqa: g'alaba qozonilgan o'yinning xatolari tez unutiladi. Ammo “Al Jaish”ga imkoniyat boy berildi, “Fulad” bilan durang o'ynaldi, demak xatolar haqida gapirsa bo'ladi.

O'yin paytida xatolar qanday yuzaga keladi? Boshqacha aytganda, bir jamoa qaysi sabablarga ko'ra boshqa bir jamoani mag'lub eta olmaydi? Albatta, buning sabablari ko'p, lekin xatolar yuzaga kelishining avvalo ikkita sababi bor deb o'ylaymiz. Birinchisi, futbolchilarning saviyasi past bo'lsa, ketma-ket xatolar ro'y beradi. Ikkinchisi, saviya yuqori bo'lgani bilan bir-birini tushunmaslik oqibatida xatolar yuzaga keladi.

“Bunyodkor”ni yangi jamoa deb bo'lmaydi. Masalan, “Lokomotiv” bilan taqqoslaganda yangi jamoa emas. Ammo jamoaning o'yinida pasayish yuzaga kelgani bor gap. Buni pasayish degan maqulmi, yoki OCHLdagi boshqa klublarning kuchayishimi, to'g'risi, bir narsa deyish qiyin. Ammo bu ikki fikrni tarozining ikki pallasiga qo'yadigan bo'lsak, OCHLda boshqa klublarning shiddat bilan kuchayishi og'irroq tosh bosadi. Atrofga qarang, hamma kuchayyapti, faqat biz emas. Futbolchilarimizning saviyasiga qarang, hozirgi “Bunyodkor”dan kim arab klublarida o'ynab keta oladi? Shaxsan o'zim Javlon Ibrohimovdan boshqa hech kimni ko'rmayapman. To'g'ri, jizzaxlik Sardor Rashidov oxirgi paytlarda ko'p maqtalyapti, uning epchil harakatlari ko'zni qamashtirib qo'yayotgan bo'lsa-da, maydonda bajarayotgan foydali ish koefficienti (FIK)ni yuqori deb bo'lmaydi.

“Bunyodkor”ning har ikkala o'yinida o'tkazib yuborilgan gollarni yodga oling-a. Braziliyalik Nilmar urgan ikkala golda ham uning mahorati biznikilardan ancha yuqoriligi ish berdi. To'pni oldinga tashlab Xayrulla Karimovdan o'zib ketish, buning ustiga Simonenkoni ham ortda qoldirib, darvozabonning oyoqlari orasidan gol urish albatta braziliyaliklarga xos. Bizda yo'q bunacha o'yinchi. Xayrulla Karimov oliy liga uchrashuvlarida bunaqa qarshilikka hech duch kelmagan. Nilmar esa umuman boshqa futbolchi. O'sha hujumchining ikkinchi goli-chi? Bir harakatda Simonenkodan o'zib ketdi-ya. Yoki bo'lmasa “Fulad” tomonidan kiritilgan golni aytmaysizmi. 10-raqamda o'ynagan futbolchi o'zi himoyada to'p surayotgandi. U maydon markaziga yaqinroq joyda to'pni olib qo'ydi-yu, xuddi VIP loja tomon ketayotgandek bemalol jarima maydonchasi ichiga kirib bordi. Zarba va gol! Bundayam o'yinchining mahorati yuqori ekanligi rol o'ynadi.

Mirjalol Qosimov aytganidek, xatolar yuzaga kelyapti, lekin o'sha xatolarning yo'l qo'yilishiga sabab nima? “Bunyodkor” o'yinchilarining hozirgi saviyasimi yoki mavsum endi boshlangani uchun bir-birini tushunmaslikmi? Agar mavsum endi boshlanganini aytadigan bo'lsak, “Bunyodkor” yangi mavsumga tayyorgarlikni kecha boshlagani yo'q. Jamoa yangi yildan oldinoq yig'ilgandi. Qolaversa, chet el safarlari, turli o'rtoqlik o'yinlari nima uchun tashkil qilindi? Mana shunday o'yinlarda xato yuzaga kelmasligi uchun emasmi? Nega endi yana shu xatolar takrorlanyapti? Yoki bo'lmasa ikki-uch oydan keyin “Bunyodkor” umuman boshqacha futbol namoyish etadigan jamoaga aylanib qoladimi?

Lekin hozirgi tarkib bilan buni uddalash qiyin. Chunki ikki-uch oydan keyin asosiy tarkib azolarining saviyasi birdaniga o'sib qolishiga ishonmaymiz. Bola boshidan malum deganlaridek, G'ofurov, Karimov, Simonenko, Pishur, Bugalo, Zuxurov kabi futbolchilar allaqachon pishib bo'lishgan. Ularning bundan ortiq nimanidir uddalashiga ishonish qiyin. Lekin ikkinchi tomondan bu o'yinchilar o'rniga munosib nomzodlar ham yo'q-da. Masalan, Pishurning o'rnini kim to'ldirishi mumkin? Hech kim. Xayrulla Karimov o'rnini-chi? Bobur Akbarov deyishga shoshilmang, unga hali vaqt bor. Qolaversa, hozirgi “Bunyodkor”da pleymeykerning o'zi yo'q. Jamoa o'yinini maydon markazida kim boshqaradi?

Javlon Ibrohimov – durust, lekin uning yonida mahorat bobida Javlondan qolishmaydigan birorta pleymeyker bo'lishi kerak-da. Qosimov “Al Jaish” bilan o'yinda Karles Kotoni o'rtaga qo'yib ko'rgandi, ispaniyalik futbolchiga to'p tushgan zahoti nuqul qanotga tortaverdi. O'rganib qolgan-da! Sardor Sobirxo'jaev ham, Dilshod Jo'raev ham “buzuvchi”, yaratuvchi yo'q markazda. Mana shuning uchun ham xatolar yuzaga kelmoqda. “Bunyodkor” bu yil oliy ligada sakkizinchi mavsumini o'tkazadi. O'tgan 7 yil ichida klub hech bo'lmasa bitta yaxshi pleymeykerni tarbiyalaganda edi, jamoaning o'yini hozirgidek qashshoq holatga kelib qolmagan bo'lardi.

Xayrulla Xoliqov.

Xatolar ikkita holat tufayli yuzaga keladi (Mulohaza)