Hozirgacha bu jamoalar rasmiy va o'rtoqlik bellashuvlarida umuman to'qnash kelishmagan. Uchrashuv biz uchun katta ahamiyatga ega. Chunki dastlabki turlarda yo'qotilgan ochkolar tufayli endi xato qilishga haqqimiz yo'q.

Vetnam terma jamoasi Osiyoda kuchsiz jamoalar toifasiga kiritiladi. Chunki bu jamoa qita miqyosida aytarli muvaffaqiyatlarga erishmagan. Lekin oxirgi yillarda ushbu mamlakatda millionlar o'yiniga katta etibor qaratilmoqda. Natijada asta-sekinlik bilan chempionat o'yinlariga qiziqish ortyapti, milliy terma jamoaning kuchli raqiblarga qarshi o'rtoqlik o'yini o'tkazishga imkoniyat yaratilmoqda. Kelajakda yaxshiroq natijalarni qo'lga kiritish uchun hozirdan shunga yarasha harakat zarurligini vetnamliklar allaqachon tushunib etishgan. Ular har bir o'yinga puxta tayyorgarlik ko'rib, o'sha bellashuvdan tegishli foyda olishga intilishyapti. O'zbekiston bilan uchrashuvga 27 sentyabrdan tayyorgarlik ko'rishga kirishganlar. Albatta, bu bilan ularning saviyasi birdaniga ortib qolmaydi, lekin vaqt o'tishi bilan barchasi ijobiy samara keltiradi. Bu jamoaning BAA bilan o'z maydonidagi o'yini yomon taassurot qoldirgani yo'q. O'sha kuni Vetnam hech bo'lmaganda muxlislarini durang bilan xursand etishga urindi, biroq mehmonlar baribir kuchliroq chiqishdi. Ikkinchi turda esa Gonkongdan so'nggi daqiqalarda o'tkazib yuborilgan gol tufayli mag'lubiyatga uchrashdi.

VETNAM FUTBOL ASSOCIACIYASI
Tashkil topgan yili: 1962
FIFA azosi: 1964
OFK azosi: 1964
Rasmiy sayti: www.vff.org.vn
Prezidenti: Nguen Tron Xi
Futbol bilan shug'ullanuvchilar soni: 1874350
Ro'yxatdan o'tgan futbolchilar soni: 24150
Klublari soni: 35
Futbol rasmiylari soni: 10652

Vetnamda futbol 1896 yilda o'ynala boshlangan. Uni francuzlar olib kirishgan. Vetnamliklardan tuzilgan ilk jamoa 1908 yil birinchi bahsini o'tkazgan. 1928 yil esa mahalliy eng yaxshi futbolchilar yig'ilgan jamoa Singapurdagi turnirda qatnashgan. Uzoq vaqtgacha Vetnamda Shimoliy va Janubiy terma jamoa mavjud bo'lgan.
Shimolliklar 1956 yildan 1966 yilgacha asosan kommunistik davlatlar termalari bilan o'yinlarda maydonga tushganlar. Shimol jamoasi 1945 yildan 1975 yilgacha Vetnam terma jamoasi sifatida etirof etilgan.

Janubiy Vetnam terma jamoasi 1949 yildan 1975 yilgacha faoliyat ko'rsatgan. Shu davr ichida ikki bor Osiyo Kubogi final bahslarida ishtirok etgan.

1980 yil Vetnam PFL tashkil etilgan. Uzoq davom etgan fuqarolar urushidan so'ng futbolda ham tartib o'rnatishga kirishganlar. 1989 yilda VFF yangi tartibda ishlashga o'tdi. Futbolda bir qator islohotlar o'tkazildi. 1991 yil Vetnam terma jamoasi 18 yillik tanaffusdan keyin ilk rasmiy bellashuvida maydonga tushdi. Shu tariqa Vetnam terma jamoasining tarixi boshlangan.

Vetnam terma jamoasi uchun Xanoyda “May Din” stadioni qurib bitkazilgan. 2003 yilning sentyabrida ochilgan stadion 40192 tomoshabinni bag'riga sig'diradi. Qurilish qiymati 53 million AQSH dollariga teng bo'lgan.

Ayni paytda VFF bir qator yirik kompaniyalar bilan homiylik va hamkorlik aloqalariga ega. Bosh homiylar Nike va Honda Vietnam kompaniyalari sanaladi. Shuningdek, Eximbank, Petro Vietnam, Hoa Sen Group, Kova Paint, Boss Paint, Dong Luc Group, Viettel Mobile, Cuulong Steel, Thai Son Nam Group, Phan Lan Nung Chay Group, Canh Buom Do Group, Huu Lien A Chau Joint-Stock Company kabi firmalar ham federaciya faoliyatini qo'llab-quvvatlab kelishmoqda. Bu borada Vetnamda ishlar yaxshi yo'lga qo'yilganini hamkorlarning sonidan ham bilib olish mumkin.

VETNAM RESPUBLIKASI
Rasmiy nomi: Kong Xoa Xa Xoy Chu Ngiya Vetnam
Poytaxti: Xanoy
Hududi: 329560 kv.km.
Aholisi: 91 million
Valyutasi: dong

Vetnamda yuz bergan urush tafsilotlari haqida ko'pchilik biladi. Shu sababli mamlakatda turli sohalarning rivojlanishi o'tgan asr oxirlarida ko'p yillar davomida to'xtab qolgan. Hududi bo'yicha O'zbekistondan kichikroq bo'lgan Vetnamda 91 million aholi istiqomat qiladi. 24 ming nafardan ortiq inson futbolchi sifatida rasman qayddan o'tkazilgan.

VETNAM MILLIY TERMA JAMOASI
Laqabi: “qizil jangchilar”, “oltin yulduz”
Bosh murabbiyi: Xoang Van Fuk
Sardori: Le Tan Tay
Eng ko'p o'ynagan futbolchisi: Nguen Min Fuong (73 uchrashuv)
To'purari: Le Kon Vin (31 gol)
Stadioni: “May Din”, 40 ming tomoshabinga mo'ljallangan
FIFA reytingidagi o'rni: 153
Eng yuqori o'rni: 84 (1998 yil, sentyabr)
Eng quyi o'rni: 172 (2006 yil, dekabr)
Birinchi xalqaro o'yini: Filippin – 2:2 (1991 yil, 26 noyabr, Manila)
Eng yirik g'alabasi: Guam – 11:0 (2000 yil, 23 yanvar, Xoshimin)
Eng yirik mag'lubiyati: Ummon – 0:6 (2003 yil, 29 sentyabr, Inchon)
Erishgan yutuqlari: Osiyo Kubogi-2007 chorak finalchisi, ASEAN chempionati g'olibi-2008, VFF Kubogi sohibi (2005, 2009), Xoshimin xalqaro turniri g'olibi (2003, 2005, 2010).

Vetnam terma jamoasining yulduzi deb Le Kon Vinni ko'rsatish mumkin. Terma jamoa to'purari bo'lib turgan hujumchi ayni paytda Yaponiyaning birinchi divizionida “Konsadole Sapporo” klubi sharafini himoya qilmoqda. U bundan 3 yil avval Portugaliyaning “Leksush” klubida to'p tepgan. Ko'plab uchrashuvlarda uning mahorati evaziga kerakli gollar urilgan.

Terma jamoa bosh murabbiyi Xoang Van Fuk bir paytning o'zida olimpiya va milliy terma jamoa bosh murabbiyi hisoblanadi. U Vetnam o'smirlar va olimpiya terma jamoalari bilan muvaffaqiyatli ishlagach, VFF rahbariyati Fukni milliy terma jamoa bosh murabbiyi etib tayinlash haqida qaror qabul qildi.

Xoang Van FUK
Tug'ilgan yili: 1964
Tug'ilgan shahri: Xanoy

Boshqargan jamoalari: 2006–2009 “Xanoy”, 2009–2011 Vetnam U-16, 2011–2013 “Xanoy”, 2012 Vetnam U-23, 2013 yildan Vetnam milliy terma jamoasida.

Vetnam chempionati haqida to'xtaladigan bo'lsak, yuqori ligada 12 jamoa ishtirok etadi. Bahorda start oladigan mavsum avgust oyida yakuniga etadi. Shu sababli ayni paytda futbolchilar tatildan qaytib, terma jamoa mashg'ulotlarida qatnashishga kirishishdi. Vetnam chempionati markaziy o'yinlariga 30 mingga yaqin muxlislar tashrif buyurishadi. Mamlakatda sig'imi 20 mingdan yuqori bo'lgan bir qancha stadionlar mavjud. 2013 yil 8 jamoaning stadioni shunday bo'lgani etiborli holatdir. Bahslarga o'rtacha tashrif 10 mingdan ortiqroqni tashkil qilmoqda. Uchrashuvlarni 4 telekanal translyaciya qilish huquqini sotib olgan. Umuman olganda, Vetnam qitamizda futbolni rivojlantirish uchun endigina boshlang'ich qadamlarini qo'yayotgan davlatlardan biridir.

Vetnam terma jamoasi murabbiylar shtabi Qatar bilan o'rtoqlik va O'zbekiston bilan Osiyo Kubogi saralash bahsiga taklif etgan futbolchilar ro'yxati bilan tanishing. Bular orasida faqat Le Kon Vin mashg'ulotlarga 13 oktyabr kunidan qo'shildi. Qolganlar esa 27 sentyabrdan Xanoyda boshlangan yig'inda ishtirok etishdi.

Darvozabonlar
23. Tran Ngok Buu
22. Nguen Txan Bin

Himoyachilar
16. Nguen Suan Txan
5. Vo Xoang Kuan
2. Au Van Xoan
3. Nguen Giya Si
17. Tran Xan Lam
6. Chau Fuk Vin
4. Nguen Van Bin
17. Fung Van

Yarim himoyachilar
7. Cao Si Kung
8. Nguen Ngok Zuy
19. Fam Txan Liong
10. Nguen Xoang Chong
12. Xuyn Kuok An
20. Din Txan Chung
24. Xoang Van Bin
26. Le Van Txang

Hujumchilar
13. Nguen Kuang Xay
11. Nguen An Dik
28. May Tyan Tan
9. Le Kon Vin

Bugun bo'lib o'tadigan bellashuvda Vetnamning terma jamoamizga jiddiy qarshilik qilishini kutish mumkin. Shu sababli ishqibozlarni “Paxtakor” Markaziy stadioniga tashrif buyurib, futbolchilarimizni qo'llab turishga chaqirib qolamiz. Chunki bu bizning terma jamoa.

Behzod NAZAROV tayyorladi.

Vetnamga qarshi birinchi uchrashuv