Аниқроғи, "шерлар" иккита тўп фарқи билан олдинда бораётган пайтда "Сурхон" камбэк амалга оширди. Бунда Термиз клубининг 11-рақамли футболчиси катта ишни амалга оширди. Дастлаб, жаримадан Қувватов дарвозасини ишғол қилган испаннинг 90+3-дақиқада бошлаган ҳужумини Бобожонов гол билан якунлади.

Гап "Реал" тарбияланувчиси Луис Мигель Кезада ҳақида кетяпти. У 1996 йил Мадридда доминиканлик муҳожирлар оиласида туғилган. 10 ёшида "Реал" академиясига қабул қилинган футболчи 2016-2019 йилларда "қаймоқранглилар"нинг фарм-клуби — "Кастилья"да тўп тепди.

Бу орада Зидан томонидан асосий жамоага ҳам жалб қилиб турилди. Хусусан, 2017 йил "Реал" либосидаги дебютини нишонлади. Ҳатто Халқаро чемпионлар кубоги доирасидаги "Манчестер Юнайтед"га қарши ўртоқлик ўйинида Рафаэль Варанни алмаштирган Луисми де Хеа дарвозасини пенальтидан ишғол қилган эди.

У "Кастилья"да Феде Вальверде, Ашраф Ҳакими, Марио Эрмосо ва Мартин Эдегор сингари бўлажак юлдузлар билан бирга тўп тепган. Сизни ҳайрон қолдириши мумкин, аммо ҳозир "Тоттенхэм"да ўйнаётган Серхио Регилон ўша даврда Кезаданинг ўринбосари эди.

"Реал"нинг асосий таркибидан жой тополмаган Луисми 2019 йилда "Кадис"га кўчиб ўтди. Бу ерда оғир жароҳатга йўлиққан ярим ҳимоячи деярли 2 йилни майдон ташқарисида ўтказиб юборди.

Ниҳоят, 2022 йилнинг аввалида "Сурхон" таркибида қўшилган футболчи аста-секин спорт формасини тиклаб оляпти. Шундай экан, Луисми Кезада нималарга қодирлигини чемпионат якунига қадар барчага исботласа керак.

Ўзбек футболи ҳақидаги "Футбол анализи" блогига обуна бўлинг!

"Сурхон"да ўйнаётган "Реал"нинг собиқ футболчиси ҳақида