Мазкур баҳсни томоша қилиш учун ўйингоҳга "Ан Насср" ярим ҳимоячиси Жалолиддин Машарипов ҳам ташриф буюрган. Биз фурсатдан фойдаланиб, хоразмлик футболчидан мухлисларни қизиқтирган бир қатор саволларга жавоб олдик.

— Бугун "Пахтакор" ҳужумида ёшлар ўйнаяпти. Уларнинг даражасини қандай баҳолайсиз?

— Ўйинчиларнинг ҳақиқий кучини "Сурхон"га қарши ўйинда кўриб бўлмайди. Кучлироқ рақиблар, масалан, ОЧЛ баҳсларида айтса бўлади. Бугунги ўйин ҳақида бир нарса дея олмайман.

— Ҳозир жамоадаги энг яхши ўйинчи?

— "Пахтакор" сафидаги энг юқори савиядаги ўйинчи сифатида Драган Черан ҳисобланади.

— Эрен Дердийок клубдан кетди. Жорий мавсумдаги статистикасига эътибор қаратсак, ҳавас қиларли эмас. Швейцариялик ҳужумчини "Пахтакор" учун омадсиз трансфер деса бўладими?

— Йўқ, Эрен жуда кучли футболчи. Шунчаки, у жамоага мослашиб кетолмади. Бунақаси барча футболчида учраб туради. Баъзан сизга жамоанинг ўйин услуби мос келмаса, баъзан муҳитга кўниколмайсиз. Аммо, Дердийок жуда кучли ҳужумчи, вақтида ажойиб ўйинлар кўрсатган.

— "Шабаб Ал Аҳли" ва "Ан Насср" ўртасидаги ижара шартномаси якунланди. Танаффусдан кейин сизни қайси жамоада кўрамиз?

— Ҳозир бу ҳақда бир нарса дея олмайман...

— Жафар Ирисметов билан гаплашганимда ёзда собиқ футболчиларни қайтариш режалаштираётгани ҳақида айтганди. Кейинроқ, Ҳамдамов, Сергеев ва Ҳамробековнинг ёзда жамоа сафига келиб қўшилиши ҳақида миш-мишлар тарқалди. Сиз қайтишни режалаштирмаяпсизми?

— "Пахтакор"да ўйнаш учун ҳар доим тайёрман. Биласизми, клубга эртагаёқ қайтишим мумкин. Фақат жамоа раҳбарияти бунинг учун етарли шароит яратиб бериши керак.

Жалолиддин Машарипов Суперлигага қайтадими?