2013 yildan buyon “Andijon” jamoasi ijrochi direktori lavozimida ishlab kelgan Aleksandr Shapran o'z vazifasidan ozod etildi. Uning o'rniga Shuhratbek Tolibjonovich O'rinboev “Andijon” futbol klubi bosh direktori etib tayinlandi.

Bugun kun yarmida “Andijon” futbol klubi qarorgohining majlislar zalida yig'ilish bo'lib o'tdi. Mazkur yig'ilishda Andijon viloyat hokimligining tashqi ishlar nazorat-taftish bo'limi boshlig'i Shavkatbek Nishonov ishtirok etib, murabbiy va futbolchilarga Shuhratbek O'rinboevni “Andijon” klubining yangi ijrochi direktori sifatida tanishtirdi.

Andijon viloyati hokimiyati O'rinboevga “Andijon” klubida sog'lom muhit va barqaror jamoa shakllantirishiga ishonch bildirdi. Yig'ilishda so'z olgan Shuhratbek Tolibjonovich Andijon viloyati hokimi tomonidan bildirilgan ishonch uchun minnatdorchilik bildirib, o'ziga bildirilgan ishonchni oqlab, “Andijon”da yaxshi jamoa shakllantirishini malum qildi. Yig'ilishda shuningdek, jamoa bosh murabbiyi vazifasini bajarayotgan Orif Mamatkazin ham so'z olib, Shuhratbek O'rinboev bilan birga avval ham birga yaxshi faoliyat olib borganini aytib o'tdi.

Futbolchilardan Aziz Ibragimov so'z olib, “Andijon” uchun hammasi tugamaganligini va oliy ligada qolish imkoniyati borligini aytib, buning uchun tushkunlikka tushmasdan oxirigacha kurashishlari aytdi.

Shuni aytib o'tish kerakki, Shuhratbek O'rinboev uchun “Andijon” begona jamoa emas. Bu inson 2004-2008 yillar davomida “Andijon” klubida faoliyat ko'rsatgan. Muxlislar yaxshi bilishsa kerak, 2005 yili O'rinboev jamoa raisi bo'lib ishlagan dastlabki mavsumda “Andijon” birinchi ligada muvaffaqiyatli qatnashib kuchlilar safiga qaytgan.

Shuningdek, 2006 va 2007 yillarda O'rinboev rahbarligida jamoamiz oliy ligada yomon natija ko'rsatmagan. Malum muddatli tanaffusdan so'ng Shuhratbek O'rinboev yana “Andijon” jamoasida faoliyatini boshladi. O'rinboevning “Andijon”dagi bu safargi faoliyati ham muvaffaqiyatli chiqishiga ishonamiz.

Shuhratbek O'rinboev "Andijon" klubi bosh direktori etib tayinlandi