- Shavkat aka, Sho'rtanni tark etganingiz haqida malumotlarga egamiz. Buni qanday izohlaysiz?
- Nima deyishim mumkin?! Hammasi oddiy kechdi. Murabbiy xorijdan ikkita legioner himoyachi kelayotganini takidladi va joyni bo'shatib qo'yishimni tushunib etdim.

- O'tgan yili jamoaning yana kuchlilar safiga qaytishida hissa qo'shgandingiz. Bugunda esa jamoa siz bilan xayrlashishni lozim topdi. Voqealar rivoji bunday tus olishini kutmagan bo'lsangiz kerak?
- Albatta. Bu yil ham jamoada qolib, oliy ligada o'ynamoqchi edim. Lekin bazida shunday kutilmagan xodisalar uchrab turadi. Bunga tayyor turish kerak.

- Murabbiyning siz bilan xayrlashish qarorini eshitish, ruhiy xolatingizga tasir o'tkazgandir?
- Bu - futbol! Muxtor aka Qurbonov bilan munosabatimiz haligacha yaxshi. Hech qanday hafagarchilik bo'lmadi va bir-birimizga kelajakda omad tiladik. Qolaversa jamoadagilar bilan ham do'stona ravishda xayrlashildi.

- Siz bilan nima uchun bunday bo'lganini keyinchalik atroflicha o'ylab ko'rdingizmi? Demoqchimanki, bugungi tayyorgarligingizdan shikoyat yo'qmi?
- Nima desa bo'ladi, jamoa 7 dekabr kuni tayyorgarlikni boshlagandi. Shundan buyon barcha mashg'ulotlarda ishtirok etdim. Imkon qadar o'zimni ko'rsatishga urindim. Bu savolga murabbiylar aniqroq javobni berishi mumkin.

- Garchi o'tgan yili deyarli har bir uchrashuvda maydonga tushgan bo'lsangizda, sizda ortiqcha vazn yuzaga kelganini ko'rish mumkin. Bu nima bilan bog'liq deb hisoblaysiz?
- (Kulib) Bu - menda tug'ma. Mashg'ulotlarda vazn yo'qotish maqsadida astoydil ter to'kdim va bunga qanchadir miqdorda erishdim.

- Endigi rejalar qanday?
- "Sho'rtan" bilan yaqindagina xayrlashganim bois hozircha uydaman. Ochig'ini aytganda, takliflar yo'q. Bilmadim agar keyinroq qaysidir klubdan chorlov bo'lsa, o'ylab ko'rarman.

- O'tgan yili birinchi ligada o'ynadingiz. Nima deb o'ylaysiz, bu yil yana oliy ligada o'ynab keta olasizmi?
-Hammasini vaqt ko'rsatadi. Sizga aytsam, elitada o'ynashga kuchim etadi va buning uchun doimo xarakat qilaman.

Islombek Rustambekov.

Shavkat Nasibullaev: G'uzorliklar bilan do'stona xayrlashdim