Lekin bu borada masala to'laligicha aniq bo'lib ulgurmagan ko'rinadi. Boisi keyingi yil OCHLda ishtirok etish huquqini beruvchi ushbu ahamiyati yuqori bo'lgan final o'yinini qashqadaryolik ko'plab muxlislar viloyatda, xususan Samarqanddagi "Dinamo" markaziy stadionida o'tkazilishini talab qilib, O'FFga yozma ravishda murojaat qilgan.

Aslida "Nasaf" azolari bunga nima deydi? Bu borada dastlab, bosh murabbiy Ro'ziqul Berdievning fikrlari bilan qiziqdik.

- PFL mavsum boshida Kubok finaliga qaysi jamoa chiqishidan qatiy nazar, avvaldan stadion nomini reglamentda ko'rsatib o'tadi", - deydi Ro'ziqul Berdiev. "Bu yilgi final bahsi "Paxtakor" stadionida o'tishi kutilmoqda. Lekin bilishimcha, qashqadaryolik bir qator ishqibozlar PFLga bu borada yozma ravishda murojaat qilib, "Nasaf" - "Bunyodkor" bahsini Samarqandda yoki boshqa viloyatda o'tkazilishini so'rashgan.

- Shaxsan siz bunga qanday qaraysiz?
- Kubok finali ilgari asosan Toshkentda o'tkazilib kelingan. Menimcha viloyatdagi stadionlarda, minglab muxlislar qarshisida, katta bayram sifatida o'tkazilsa yanada qiziqarli bo'lardi. Muxlislar bunday ahamiyati yuqori bo'lgan o'yinlarni tribunasi to'lgan stadionlarda o'tishini juda juda xohlaydi. Baribir bu yilgi final o'yini, yana poytaxtda o'tkazilsa kerak. Sababi yil boshida reglamentda shunday deyilgandi. Ochig'i, 25 sentyabr kuni final qaerda o'tsa ham o'sha erda o'ynashga majburmiz. Buni O'FF qiladi.

- Final o'yiniga jamoangizning tayyorgarligi qanday ketmoqda?
- Hammasi reja asosida. Birgina muammo bu oxirgi paytlarda futbolchilarimizning tez-tez jarohatga yo'liqayotganidir. Kubok bahsida ikkala jamoada ham imkoniyat teng.

- Final bahsidan oldin, "Nasaf"ni yana bir muhim o'yin kutib turibdi. Yani juma kuni o'z maydoninglarda "Paxtakor"ni qabul qilasizlar?
- Ha, chempionat taqvimiga ko'ra, ketma-ket uchta qiyin o'yinlarni o'tkazishga majbur bo'lmoqdamiz. Bundan oldin safarda "Lokomotiv" bilan o'ynagandik. Unga bir nechta jarohat tufayli yo'qotishlar bilan borgandik. Shu bois bu bizga jiddiy muammo keltirib chiqardi. "Paxtakor" bilan o'yinda ham Shoxruh Gadoev bilan Shuhrat Muhammadiev yordam bera olmaydi. Muhammadiev menimcha finalga qadar to'liq tayyor xolatga keladi. Ilhom Shomurodovning jarohati esa u qadar jiddiy emas.

- "Lokomotiv"dan uchralgan mag'lubiyatdan keyin, futbolchilarni keyingi o'yinlarga tayyorlab borish oson bo'lmayotgandir?
- Albatta, mag'lubiyat hech kimga yoqmaydi. Lekin biz futbolchilar bilan suhbatlashdik va Toshkentda uchralgan mag'lubiyatni tezroq unitib, keyingi muhim uchrashuvlarga etibor qaratish kerakligini uqtirdik.

Jahongir Mirzo suhbatlashdi.

Ro'ziqul Berdiev: "Final viloyatlardagi stadionda katta bayram sifatida o'tkazilsa yaxshi bo'lardi"