Yaxshi bilasiz, shu kunlarda milliy jamoamiz 14 va 19 noyabr kunlari bo'lib o'tadigan JCH-2022 saralash bosqichidan o'rin olgan ikkita o'yinga tayyorgarlik olib bormoqda. 14 noyabrda Saudiya Arabistonini qabul qilsak, 19 noyabr kuni Falastin bilan o'ynaymiz.

Qirg'izistonga qarshi kechadigan bahs rasmiy o'yinlar oldidan o'ziga xos repeticiya vazifasini bajarib beradi. Shu o'rinda ko'pchilikni qiziqtirayotgan savol: O'zbekiston - Qirg'iziston bahsi FIFA reytingiga tasir qiladimi?

Bu savolga javob olish maqsadida Alisher Nikimbaevga murojaat qilganimizda taniqli mutaxassis shunday dedi: "O'rtoqlik o'yinlari FIFA reytingiga tasir qilishining o'ziga yarasha qonun-qoidalari bor. Birinchidan, futbolchi almashtirishlar soni 6tadan oshmasligi kerak. Agar 7 nafar futbolchi almashsa reytinga tasir qilmaydi. Ikkinchidan, bu o'yin FIFA kunlarida bo'lib o'tmasligi bois reytinga tasir qilgan taqdirda ham bahosi past bo'ladi".

P.S. FIFA yillik taqvimida 11-19 noyabr terma jamoalar uchun rasmiy va o'rtoqlik uchrashuvlari kuni sifatida belgilab qo'yilgan. Biz Qirg'iziston bilan 9 noyabrda o'ynaymiz, bu esa FIFA kunlariga kirmaydi. Endi o'yin payti nechta futbolchini almashtirish har ikki jamoa bosh murabbiylarining o'zaro kelishuviga qarab amalga oshirilsa kerak.

Ayni paytda O'zbekiston FIFA reytingida 1287 ochko bilan 85, Qirg'iziston esa 1252 ochko to'plab 94-o'rinni egallab turibdi.

Qirg'iziston bilan o'yin FIFA reytingiga tasir qiladimi?