Senator Usmonov O'FF tarkibida Terma jamoalar markazining tashkil qilinishi oldinga tashlangan qadam bo'lganini alohida takidlagan bo'lsada, tashkilotning bugungi faoliyatidan qoniqmayotganini aytib o'tdi. Haqiqatdan ham, TJMga bo'lgan norozilik kundan-kunga oshib boryapti. 180 nafarga yaqin hodim ishlayotgan bu “dargoh”dagi ishlar ko'ngildagidek emas. Odatda son emas, sifatga etibor qaratilardi. Bizning TJMda esa teskarisi bo'lyapti. Shuncha odam mehnat qiladiyu, lekin samara, foydali ish koefficenti degan tushunchalar yo'q.

Ilgari O'FF qoshida terma jamoalar bilan ishlash bo'limi faoliyat ko'rsatardi. Bu erda Alisher Nikimbaev boshchiligida chamasi 5-6 nafar mutaxassis ishlardi. To'g'ri, u paytda hozirgidek 13-14 ta terma jamoa bo'lmagan. Lekin o'sha kamchilik holatda ham ular yomon ishlashmagan. Har holda Toshkentda milliy terma jamoalar miqyosida o'rtoqlik uchrashuvlari o'tkazib turilardi. So'nggi bor o'z uyimizda o'rtoqlik o'yini o'tkazganimizga ham ancha yil bo'libdi. Vaholanki, bugunga kelib O'FF tomonidan TJMga juda katta vakolat va imkoniyatlar yaratib berilyapti. Kattagina summa ajratilmoqda. Murabbiylar Kengashi majlisida M.Usmonov aynan shu masalaga ham alohida to'xtaldi. O'FF Prezidentining so'zlariga ko'ra, o'tgan yili birgina TJM uchun 10 milliard so'm miqdorida mablag' ajratilgan. Davlat kursida dollarga chaqadigan bo'lsak, bu deyarli 5 million dollar deganidir. Bu kichik summa emas. Reja asosida ishlatilsa, ancha-muncha islohotlarni amalga oshirish mumkin. Lekin Usmonovga ko'ra, yildan-yilga harajatlarning oshib borishiga qaramay, markaz faoliyatida o'sish kuzatilmayapti. Bu tarzda ishlashda davom etilsa, o'zgarish bo'lmaydiyam-da! “Biz Markaz uchun u tashkil qilingan kundan buyon qanchadan-qancha sarf harajatlar qildik. Kerakli sharoit yaratib berilsin uchun Markaz rahbariyatining asoslab berilgan taklif va mulohazalarini qabul qilib, tashkilot faoliyatini kuchaytirish yo'lidagi har bir ishini qo'llab-quvvatladik. Pulni ayamadik. Bugungi kunga kelib esa, “Terma jamoalar markazi” federaciyadan ham ishchisi ko'p, shtat jadvali juda katta tashkilotga aylandi”, - deydi Usmonov.

TJM muxlislar va OAV hodimlari tomonidan asosan tayinli o'rtoqlik o'yinlari tashkil etmayotganda ayblanmoqda. Endi 80ta federaciyaga “Toshkentga kelinglar, biz o'z maydonimizda o'rtoqlik uchrashuvi o'tkazishni maqsad qilganmiz”, qabilida xat jo'natgan bilan ish bitmaydi. Hammaga bir hil mazmundagi xatning “kopiya”sini yuborish va maktubning javobini kutib, pochtani “obnovit” qilib o'tirish orqali hech narsaga erishib bo'lmaydi. Har bir davlat federaciyalari bilan alohida-alohida gaplashish kerak. Tekinga hech kim kelmaydi, ahir. Qolaversa, biz Evropadan uzoqda joylashganmiz. Hamma jamoalar ham bunga darrovgina ko'nmaydi. Yodingizdami, Qozog'iston UEFAga o'tish bo'yicha ariza yozganida, Evropa mamlakatlari futbol federaciyalari bunga qarshi chiqishgandi. Ular kuchsiz jamoadan emas, yo'l azobini o'ylab, bunga qarshi bo'lishgan. Lekin qalovini topsang, qor ham yonadi, deyishadi. Buning uchun ishlash, izlanish kerak. Ochig'ini aytish kerak, TJMda kuchli, o'z ishining ustalari juda kam, deyarli yo'q desa ham bo'ladi. Xalqaro munosabatlardan xabari bor, futbolni hayotining mazmuni deb hisoblaydigan, kamida ikkita xorij (rus tilidan tashqari) tilini yaxshigina biladigan yosh hodimlarni ishga qabul qilish kerak. Eskicha fikrlash endi o'tmaydi. Yoshlar birdaniga ishlab keta olmaydi. Ularni qo'llab-quvvatlab yordam berilsa, albatta malum vaqt o'tib o'z mevasini beradi.

Yanvar oyida Ummonda o'tkazilgan Osiyo chempionatidagi omadsizlikda ham aslida bosh aybdor TJM bo'ldi. Tayyorgarlik ko'rish uchun tayinli sharoitlar yaratib berilmadi. Chempionat boshlanishiga bir hafta qolganida, BAAda tashkil etib berilgan naridan beri o'quv-mashg'ulot yig'inini yaratilgan sharoit sifatida qabul qilib bo'lmaydi. BAA va Ummonning birinchi liga klublariga qarshi o'rtoqlik o'yini o'tkazishning o'zi biz uchun uyat. Shundan ham TJMning faoliyatiga baho berish mumkin. Vaholanki, o'sha paytda BAA va Yaman terma jamoalaridan har tomonlama manfaatli takliflar bo'lgandi. Eng muhimi, ularning o'zlari bizga taklif bilan chiqishgandi. O'zimiz o'rtoqlik o'yini tashkil etishni eplay olmaymiz, tayyor taklifga esa noz qilamiz. “Ummonda o'tkazilgan 22 yoshgacha bo'lgan futbolchilar o'rtasidagi Osiyo chempionatidagi omadsiz ishtirokidan keyin Terma jamoalar markazi mutasaddilarining televidenie, radio va gazeta orqali bergan intervyularini ko'rdim. Nima emish, musobaqa yanvarda o'tkazilganligi sababli terma jamoamiz Ummondagi musobaqada mag'lubiyatga uchrabdi. Endi aytingchi, Siz turnirning yanvarda o'tkazilishini kecha bildingizmi? Yanvardaligini bila turib, nega etarlicha tayyorgarlik ko'rmadingiz? Ertaga Osiyo Kubogi yanvarda o'tkazilsa, yana nimalar deysizlar?”, - deya mavzu yuzasidan o'z etirozini bildirdi O'FF Prezidenti.

Rejaga ko'ra, milliy terma jamoamiz 5 mart kuni Toshkentda Osiyo Kubogi-2015 saralash guruh bosqichidagi so'nggi uchrashuvni o'tkazadi. Ushbu o'yinga qaratilgan yig'in 27 fevral kunidan boshlandi. O'tgan yili BAAga qarshi o'tkaziladigan o'yin oldidan 1 mart kuni Toshkentda o'rtoqlik uchrashuvi tashkil etish bo'yicha gap-so'zlar urchigandi. Yaqinda ham Tojikiston terma jamoasi poytaxtimizga kelishi aytilgandi. Terma jamoa bosh murabbiyi Mirjalol Qosimov bilan gaplashganimizda, “menga farqi yo'q, terma jamoa bilan o'yin o'tkazsak, kifoya”, degandi. Nachora, bu safar ham terma jamoamiz o'rtoqlik o'yinisiz qoldi. BAA bilan o'yin natijasi guruhdagi vaziyatni o'zgartirmas, lekin JCH-2014 saralashidagi omadsizlikdan so'ng muxlislarni yana stadionga qaytarish uchun bo'lajak o'yinda ishonchli g'alabani qo'lga kiritmasak bo'lmaydi. Ikkala o'yinda ham BAAga imkoniyatni boy berish... bu bizga yarashmaydi. Lekin nega shu narsalarni TJM mutasaddilari o'ylamayapti? Malta Toshkentga kelishga rozi bo'lgandi. Lekin vaqt masalasida kelisha olinmadi. Oldinga o'tib shuni aytish kerak, Malta masalasiga TJMning aloqasi yo'q. Qosimovning o'zi asosiy ishi qolib, bir nechta jamoalar bilan muzokara olib borgan. Faqat Malta 2 mart kuni Toshkentda o'ynash istagini bildirgan. Bizga esa bu sana to'g'ri kelmagan. Bizdagi malumotlarga ko'ra, ayni paytda 25-26 may kunlarining biriga o'rtoqlik uchrashuvi uchun sparring raqib izlanmoqda. Eshitishimcha, Uels terma jamoasi tomonidan taklif bo'lgan. Lekin TJMga emas. O'rtadagi agentlar Uels terma jamoasi 350 ming dollar evaziga Toshkentga kelishga tayyor ekanini aytishgan. Poytaxtimizga asosiy tarkib futbolchilari, xususan Garet Beylning kelishi ham kafolatlangan. Agar muzokaralar olib borilsa, bu summa kamaytirilishi ham mumkin. Uels kelsa, “Bunyodkor” stadioni to'lishi aniq. Kim ham “Real” yulduzi va dunyoning eng qimmat transferiga ega futbolchini jonli tarzda kerishni istamaydi, deysiz. Buning uchun, marketing ishlashi kerak. Pulni ayash kerak emas. Bir so'm sarflamasdan turib, ikki so'm haqida o'ylash noto'g'ri. Xullas, islohotlar kerak, shart va tezroq uni amalga oshirish kerak. Mirabror Usmonovning o'zi bu ishga kirishgan ekan, ijobiy natija kutib qolamiz. Muhimi, O'FF Prezidentining bu talabi qog'ozda qolib ketmasin.

Kamoliddin ALIMOV

Muhimi talab qog'ozda qolib ketmasin