ROSSIYA
Moskvaning Lokomotiv klubi safida o'ynayotgan O'zbekiston milliy terma jamoasi himoyachisi Vitaliy Denisov, 27oktyabr kuni Premer-Liganing 14-turi doirasida safarda Rubin klubiga qarshi maydonga tushdi va to'liq 90 daqiqa to'p surdi. Mazkur uchrashuvda Lokomotiv 2:1 hisobida qozonliklar ustidan g'alaba qozongan.

Maxachqalaning Anji klubi o'z uchrashuvini 28 oktyabr kuni safarda Kuban klubiga qarshi o'tkazadi. Anji safida O'zbekiston milliy terma jamoasi yarim himoyachisi Odil Ahmedov to'p surayotganidan xabaringiz bor.

QOZOG'ISTON
27 oktyabr kuni Qozog'iston premer-ligasida 31-tur uchrashuvlari o'tkazildi. O'zbekiston milliy terma jamoasi hujumchisi Ulug'bek Baqoev to'p surayotgan Pavlodarning Irtish klubi shu kuni safarda Ordabasi jamoasiga qarshi to'p surdi. Uchrashuvda 3:1 hisobida Ordabasi g'alaba qozongan. Etiborlisi, Irtishning yagona goliga O'zbekiston milliy terma jamoasiga nomzod bo'lgan hujumchi - Ulug'bek Baqoev uchrashuvning 25-daqiqasida kiritgan.

3 nafar milliy terma jamoaga nomzod futbolchi - Aleksandr Geynrix, Temur Kapadze hamda Marat Bikmaevlar to'p suradigan Aktobe klubi safarda Ostonaga qarshi maydonga tushdi va 0:1 hisobida imkoniyatni boy berdi. Aleksandr Geynrix hamda Temur Kapadzelar o'yinda to'liq 90 daqiqadan harakat qilgan bo'lsalar, jarohatidan qutulib safga qaytgan Marat Bikmaev ikkinchi bo'limning 66 daqiqasida maydonga tushirilgan.

XITOY
Xitoy Superligasida navbatdagi tur o'yinlari 30 oktyabr kuni o'tkaziladi.

JANUBIY KOREYA
26 oktyabr kuni Janubiy Koreya K ligasi ikkinchi davra o'yinlarining 5-tur uchrashuvlari bo'lib o'tdi. Ikkinchi davradan boshlab K ligada 8-14 o'rinlar uchun kurashga kirishgan Seongnam Ilva Chunma klubi tarkibida O'zbekiston milliy terma jamoasi sardori Server Jeparov to'p surib kelmoqda. Tajribali yarim himoyachi 27 oktyabr kuni safarda Degu klubiga qarshi asosiy tarkibda maydonga tushdi va 90 daqiqada harakat qildi. Etiborlisi Seongnamning uchrashuvdagi birinchi goliga, aynan Jeparov 12-daqiqada mualliflik qildi. O'yinda esa, 2:2 hisobi qayd etilgan.

OZARBAYJON
26 sentyabr kuni Ozarbayjon premer-ligasida ham 11-tur o'yinlariga start berildi. O'zbekiston milliy terma jamoasi hujumchisi Bahodir Nasimov ushbu turda safarda Semurg' klubiga qarshi o'yinda asosiy tarkibda maydonga tushdi va 63 daqiqada almashtirildi. Uchrashuvda 0:0 hisobidagi durang qayd etilgan.

QATAR
Ushbu mavsumdan boshlab, Qatar Yulduzlar Ligasi ishtirokchisi - Al Muayzir klubi sharafini himoya qilayotgan O'zbekiston milliy terma jamoasi yarim himoyachisi Fozil Musaev, 26 oktyabr kuni jamoasi safida o'z maydonida Al Jaish klubiga qarshi asosiy tarkibda maydonga tushdi. 4:2 hisobida Al Jaish klubining g'alabasi bilan yakunlangan uchrashuvda Musaev to'liq 90 daqiqa o'ynadi.

BAA
Dubayning Ash Shabob klubida to'p surayotgan O'zbekiston terma jamoasi yarim himoyachisi Aziz Haydarov 26 oktyabr kuni safarda Al Shaab klubiga qarshi kechgan uchrashuvda to'liq 90 daqiqa harakat qildi. Ash Shabob mazkur uchrashuvda 1:2 hisobida imkoniyatni boy berdi.

Legionerlar: Jeparov Seongnam safida navbatdagi golini kiritdi