Bu haqda axborot hamkorimiz hisoblangan “Futbol Ekspress” gazetasi xabar bermoqda.

Malumotlarga ko'ra ushbu g'oya O'zbekiston birinchi ligasida ishtirok etuvchi “Oq-tepa” klubi prezidenti Sarvar Shog'ulomovdan chiqqan. Gazeta muxbiri klub prezidentidan intervyu oldi.

“Bir hafta muqaddam jamoamiz qoshida tashkil qilingan futbol maktabi direktori Vladimir Gavrilov bilan qo'shni Qozog'istonga borib keldik”, - deb gap boshladi Sarvar Shog'ulomov. U erda to'rt kun bo'lib, bir qator masalalar yuzasidan muzokaralar o'tkazib qaytdik. Xususan, “Kardiff Siti”da sport direktori lavozimida faoliyat olib borayotgan do'stim Alisher Apsalamov bilan uchrashib, suhbatlashdik. Nasib qilsa, “Kardiff Siti” qo'shni Qozog'iston va O'zbekistonda o'z farm-klubini ochadi.

Ushbu fikr mendan chiqdi. Besh oydan buyon shu haqida o'ylab yurgandim. Alisher bilan fikrimiz bir joydan chiqdi. Ayni vaqtda hujjat ishlari olib borilmoqda. Yani, yurtimizda farm-klub ochish uchun nimalar kerakligi borasida ishlayapmiz. Bu ishlarning barchasi ijobiy yakunlangach, “Kardiff Siti”ning farm-klubi yurtimizda o'z faoliyatini boshlaydi.

O'zbekistondagi farm-klub “Kardiff Siti”ga tegishli bo'ladi. Ular yurtimizdagi farm-klubni moliyaviy tomondan va forma, ekipirovka bilan taminlaydi. Oddiy qilib aytganda, “Kardiff Siti”ning yurtimizdagi jamoasi tashkil qilinadi. Biz bu jamoani O'zbekistondagi tashkiliy ishlari bilan shug'ullanamiz.

Agar qonuniy tomondan imkon bo'lsa, jamoani O'zbekiston chempionati bahslarida ishtirok etishini taminlashimiz mumkin. Biz futbolchilarni malum yoshgacha shug'ullantirib, tarbiyalab beramiz. Angliyadagi bosh jamoa qaysi futbolchini maqul topsa, o'shani “Kardiff Siti”ga olib ketadi”, - deydi “Oq-tepa” klubi prezidenti.

Furqatbek Nishonov suhbatlashdi.
"Futbol Ekspress" gazetasi.

“Kardiff Siti” O'zbekistonda farm-klubini ochadi