Адама Траоре ўз клуби "Вест Хэм Юнайтед"да тренажёр залига киришдан четлатилди. Буни унинг мураббийи Нуну Эшпириту Санту маълум қилди. Мураббий собиқ Испания терма жамоаси аъзосининг мушакдор тана тузилишини "ақл бовар қилмас" деб таърифлади, аммо Траорени у шундоқ ҳам "ўзида етарлича вазн кўтариб юргани" ҳақида огоҳлантирди.
Нуну чоршанба куни "Фулхэм"га қарши бўлиб ўтадиган АПЛ ўйини олдидан ўтказилган матбуот анжуманида шундай деди: "Унинг тана тузилиши шунчаки ажойиб, бу унинг генлари билан боғлиқ".
Мураббий сўзида давом этди: "Мен унга тренажёр залидан узоқроқ юришни айтдим. Бу у тушуниб етиши керак бўлган нарсалардан бири деб ўйлайман. Унда вазн етарли. У у ерда фақат жароҳатларнинг олдини олишга қаратилган машқларни бажаради, лекин тош кўтармайди. Масалан, Айридас Голамбецкис (18 ёш) тренажёр залида соатлаб вақт ўтказади – биз уни кучайтиришимиз керак. Айнан у мушак йиғиши лозим. Траореда эса бунинг мутлақо акси".
Бунгача Траоре умуман тош кўтармаслигини таъкидлаган эди. Бироқ ўтган ҳафта унинг жамоадоши Крисенсио Саммервилл Траоренинг клуб машғулот базасида 145 килограмм штангани кўтараётгани акс этган видеони жойлаганди.
