Jahon andozalariga to'la javob beradigan stadionda ishlar kun sayin yakunlanib borayotir. Aniqrog'i, katta extimol bilan shu yilning oxirida barcha ishlar poyoniga etadi va stadion to'liq foydalanishga topshiriladi.

Bundan roppa-rosa 3 oy oldin, “Markaziy” stadionda kechayotgan ishlar xususida malumot bergandik. Xo'sh, bugungi kunga kelib, maydonning xolati qay darajada? Umuman olganda, stadionda ishlar qanday kechmoqda?

Shu kabi savollarga javob olish maqsadida O'FFdagi maydonlar bo'limining bosh mutaxassisi Ikrom Suyunov bilan bog'landik.

- Ikrom aka, charchamayapsizmi?
- (Kulib) Charchashga vaqt yo'q. Ayni paytda Namangandamiz. Bu erda ishlar reja asosida ketmoqda.

- Bundan uch oy oldin Namangandagi “Markaziy” stadionning maydoniga dastlabki urug' sepilgandi. Bugungi kunga kelib, maysada sezilarli o'sish kuzatilgan bo'lsa kerak?
- Albatta, parvarish yaxshi bo'ldi. Boshqacha aytganda urug' o'z vaqtida sepildi va shunga monand har kuni maydon sug'orilib bordi.

- Endi qachon tayyor xolat bo'ladi?
- Maydon chimi deyarli tayyor. Futbolchilar allaqachon mashg'ulot o'tkazishni boshlab yuborishgan. Bunga bir oycha bo'ldi.

- Maydonga nechchi marotaba urug' sepildi?
- Uch marta sepdik. Endi bundan keyin asosan iqlimga mos ravishda sug'orilib boriladi.

- Umuman olganda, stadiondagi tamirlash ishlari poyoniga etgandir?
- Yo'q, yana ozgina tugallanmagan ishlar turibdi. Xususan o'rindiqlar butunlay o'rnatilmagan. Maydon chetidagi yo'laklarga asfalt yotqizilgan. Lekin uning ustidan rezinka yo'laklari xali beri qilinmadi.

- Stadion direktori o'z intervyusida yangi elektron tablo olib kelinishi to'g'risida aytib o'tgandi...
- Ha, shunaqa gap bo'lgandi. Avvalgi tabloni atorofini sifatli qilib, o'rab chiqildi. Endi uning ichiga siz aytgan o'sha elektron tablo olib kelib o'rnatish qoldi xolos.

Islombek Rustambekov suhbatlashdi

Ikrom Suyunov: “Namangandagi stadionning maydoni tayyor xolatga keltirildi”