Policiya firibgarlik ayblovi bo'yicha ish ochdi. Unga "GlobalElektroServis" OAJ ("Summa" kompaniyasiga tegishli) tomonidan yollangan pudratchi tashkilotlarning biri aralashgan. Huquq-tartibot xodimlarining hisob-kitoblariga ko'ra, stadion qurilishi uchun qurilish maydonining tayyorlanishiga sarf-xarajatlar oshirib ko'rsatilgan.

28 iyun kuni IIV xodimlari "GlobalElektroServis" kompaniyasi ofisida tintuv ishlarini o'tkazishdi. "Summa" kompaniyasi vakillarining so'zlariga ko'ra, huquq-tartibot xodimlari Kaliningraddagi stadion qurilishida "GlobalElektroServis" hamda pudratchi tashkilotlarning shartnoma hujjatlariga qiziqib qolishgan.

"GlobalElektroServis" 2013 yilning dekabr oyida JCH-2018 uchun quriladigan stadion hududini tayyorlash uchun aukcionni yutib olgan edi. O'sha paytda viloyat hukumati bilan shartnoma tuzilgan va unga ko'ra, pudratchi 850 mln. rubl evaziga 22 gektar maydonda injenerlik ishlarini olib borishi kerak edi, yo'llar qurishi kerak edi. Poytaxt firmasi bu ishlar uchun "Kaliningrad Alfa stroy", "Vest" va "Geostroy" kabi pudratchi tashkilotlarni jalb qilgan.

Biroq, IIV shubhalariga ko'ra, pudratchilar faqatgina bajarilgan ishlar xarajatlarini oshiribgina ko'rsatmay, balki ish taqvimini ham buzishgan. Shartnomada ko'rsatilgan bir yil o'rniga ikki yil sarflangan. 2016 yil arena buyurtmachisi arbitraj sudiga murojaat qildi va "GlobalElektroServis" OAJdan 60 mln. rubl miqdorida pul to'lashni talab qildi, ammo ular ishda yutqazishdi.

Eslatib o'tamiz, oldinroq Sankt-Peterburgdagi stadion qurilishi uchun ajratilgan byudjetdan ham pullar o'g'irlangani aniqlangan edi.

IIV stadion qurilishida o'g'irlik bo'lganini aniqladi