Zlatan Ibragimovichning o'g'li Maksimilian "Milan" safida Italiya Superkubogida maydonga tushishi mumkin.
"Rossonerilar" bosh murabbiyi Massimiliano Allegri 19 yoshli Maksimilian Ibragimovichni turnir uchun jamoa qaydnomasiga kiritdi. Bundan tashqari, tarkibdan "Milan Futuro" a'zolari - 20 yoshli Matteo Dutu va 17 yoshli Valeriy Vladimirov, shuningdek, yoshlar jamoasidan 18 yoshli Emanuele Sala va 17 yoshli Emanuele Borsani ham o'rin olgan.
Jarohat olgan Santyago Ximenes va Matteo Gabbiya jamoa bilan Saudiya Arabistoniga bormaydi.
Italiya Superkubogi yarim finalida "Milan" "Napoli" bilan kuch sinashadi – uchrashuv 18 dekabr, payshanba kuni bo'lib o'tadi. Final esa dushanba, 22 dekabr kuniga belgilangan.
