Jumladan chempionat autsayderi “Qizilqum” o'z maydonida “Lokomotiv”ni qabul qildi va muxlislarga o'ziga xos sensacion natijani taqdim etdi. Boisi chempionlik uchun kurashyotgan temiryo'lchilar o'yining 90+4-daqiqasida o'z darvozasidan to'p o'tkazib yuborib, qimmatli ochkolarni boy berdi. Bahsdagi yagona gol muallifi bo'lgan Hurshid Yo'ldoshev (9-raqam) bugun ushbu o'yin xususida championat.asia ga blic intervyu berdi. Aytish kerakki, surxondaryolik ushbu futbolchi “Qizilqum”ga ikkkinchi davra arafasida “So'g'diyona” tarkibidan kelib qo'shilgan.

- Hurshid aka, avvalo qo'lga kiritilgan g'alaba bilan muborakbod etamiz. Ochig'i, chempionat peshqadamini mag'lubiyatga uchratishinglarni ko'pchilik kutmagandi. Shu bois bu o'ziga yarasha sensaciya bo'ldi. Aytingchi “Lokomotiv”ni nimaning hisobiga mag'lubiyatga uchratdinglar?
- Tabrik uchun rahmat. O'yin juda ham tomoshabop ruhda o'tdi. Hech bir jamoani o'yinda to'liq ustunlikka erishdi deb bo'lmaydi. Boisi bizda ham raqib jamoada ham, golli vaziyatlar yuzaga keldi. Ammo ularning barisi gol bilan yakunlanmadi. Biz o'yining oxiriga qadar kurashdik va yakunda niyatimizga etdik. O'zingizga yaxshi malumki, bundan tashqari davralar oralig'ida jamoamiz tarkibida katta o'zgarishlar qilindi. 15 nafar yangi futbolchi kelib qo'shildi. Ular bilan asta-sekin maydonda tushunib boryapmiz.

- “Lokomotiv” bungacha chempionatda birinchi o'rinni egallab kelayotgandi. Shu bois faqat ochig'ini ayting, bu jamoa bilan durang o'ynash ham sizlarni qoniqtirarmidi yoki g'alaba qozonish vazifasi qo'yilmaganmidi?
- Bugungi kunda turnir jadvalida egallab turgan o'rnimizni o'zingiz juda yaxshi bilasiz. Bu hozir klubimizning hech bir vakilini qoniqtirmayapti. Shu bois rahbariyat tomonidan barcha o'yinda, raqib kim bo'lishidan qatiy nazar, faqat g'alaba qozonish vazifasi qo'yilgan. Ishoning, “Lokomotiv” bilan o'yindan oldin g'alabani ko'zlab tushgandik. Shuning uchun ham bahsning so'nggiga qadar himoyaga yotib olmaslan, hujum qilishni susaytirmadik.

- Uchrashuvdagi yagona gol sizning hisobingizga yozildi. “Qizilqum” uchun uch ochko keltirgan golni urganingizdan so'ng, boshizdan qanday xislarni o'tkazdingiz?
- Albatta bunday uchrashuvlarda foydali to'plarni kiritish doimo yoqimli. Raqib darvozasini ishg'ol etganimdan juda quvondim.

- Nima deb o'ylaysiz, ushbu g'alabadan so'ng, “Qizilqum” uchun muvaffaqiyatsizliklar ortda qoldimikin?
- Shunday deb niyat qilamiz. Nasib bo'lsa, keyingi o'yinlarda ham muxlislarimizni quvontiramiz. Bizga o'zi bitta g'alaba kerak edi. Aslida oldingi bahslarda ham yomon o'yin ko'rsatmagandik. Biroq hakamlar xatosi va shunga o'xshash ayrim sabablarga ko'ra bundan oldingi uchrashuvlarda ochkolarni boy berdik. Umid qilamanki, endi omadsizlarning barchasi ortda qoldi.

- “Qizilqum”ning kuchlilar safida qolish imkoniyatini qanday baholaysiz?
- Bu borada imkoniyatimizni ellikka-ellik deyish mumkin. Lekin hali oldinda bir qator o'yinlar bor. Agarda ularda ijobiy natijalarsha erishi olsak, vazifani uddalay olamiz. Boshqacha aytganda, “Qizilqum”ning elitada qolishi uchun bor kuchni ishga solamiz.

Islombek Rustambekov suhbatlashdi

Hurshid Yo'ldoshev: “Qizilqum”ni oliy ligada qolishi uchun bor kuchimizni ishga solamiz”