Эслатиб ўтамиз, ўйиндаги ягона гол 90+1-дақиқада Кай Хаверц томонидан киритилди.
"Биз "Спортинг" қанчалик кучли жамоа эканлигини билардик. Охирги ҳафта давомида бу ҳақда Виктор [Дьёкереш] билан кўп суҳбатлашдик. У бизга собиқ жамоаси ҳақида кўп маълумотлар берди. Бундан ташқари, рақиб иштирокидаги кўплаб видеороликларни таҳлил қилдик.
Лиссабонга келиб, гол ўтказиб юбормасдан ғалаба билан қайтиш жуда қийин вазифа, аммо биз бунга лойиқ эдик. Жуда хурсандман, лекин бу ҳали биринчи ўйин. Жавоб баҳсига ҳам худди шундай кайфиятда ёндашамиз", — дея Мартинеллининг сўзларини келтирмоқда УЕФА расмий сайти.
Маълумот учун, "Арсенал" ва "Спортинг" ўртасидаги жавоб учрашуви 15 апрель куни Лондондаги "Эмирейтс" стадионида бўлиб ўтади. Микель Артета шогирдлари ўз уйларида ярим финал йўлланмасини ҳал қилишга ҳаракат қилишади.
