Bu Germaniya kubogining 71 final o'yini hisoblanadi. Ushbu jamoalar o'rtasidagi Germaniya kubogi final o'yinini 182 davlatda to'g'ridan-to'g'ri efirga uzatishadi.
Bu nafaqat o'yin yoki final, bu avvalo gigant jamoalarning katta bellashuvi. So'nggi yillarda Yurgen Klopp boshqaruvidagi "Borussiya" "Bavariya"ga chinakamiga qarshilik ko'rsatib kelmoqda. Dortmundliklar jahoninng eng kuchli klubi sanalmish "Bavariya"ning eng noqulay raqiblari hisoblanishadi.
"Bavariya" - "Borussiya D" to'qnashuvida hech bir jamoani favorit yoki autsayder deb bo'lmaydi. Bu ikki nemis klublari o'rtasidagi uchrashuvlar har doim o'zining jozibasi va kutilmagan natijalari orqali millionlab futbol ishqibozlarning qalbidan joy olgan.

Berlin shahri Germaniya kubogi finali doimiy mezboni
Germaniya chempionatining chempion jamoasi Kubok finalida vice-chempionga qarshi saf tortadi. Bu o'yin "Borussiya" jamoasi uchun mavsumni sovrin bilan tugatishni so'nggi imkoniyatini bersa, "Bavariya" vakillariga Chempionlar ligasida muvaffaqiyatsizlik uchun muxlislar oldidagi aybini yuvish imkonini beradi. Xosep Gvardiola jamoasi ushbu mavsumda Germaniya chempionatining birinchi davrasida Kloppnining "Borussiya"sini mehmonda yirik (0:3) hisobida mag'lub etishgan edi. Ikkinchi davrada esa Klopp Pepdan aynan shu scenariy ostida revansh olgandi.
Germaniyadagi mavsumning so'nggi, hal qiluvchi bellashuvida kimning qo'li baland keladi? Yurgen Klopp yoki Xosep Gvardiola?
Shuni ham aytib o'tish kerakki, mavsumning dastlabki bahsi ham ham aynan shu ikki grandlar to'qnashuvi bilan boshlangan edi. Germaniya superkubogi bahsida Dortmund jamoasi "Bavariya"ni engishni uddasidan chiqqani ko'pchilikni yodida bo'lsa kerak.
Hozircha Klopp Pep bilan bo'lgan qarama-qarshilikda peshqadam. Yurgen Klopp ikki marta Gvardiolani mag'lub etgan. Pep esa bungi bir marotaba javob qaytara oldi.
Germaniya kubogi finali vaziyat tenglashadimi? Yoki Klopp oradagi farqni yana bittaga oshiradimi? Buni bugun tundagi super o'yindan so'ng bilib olamiz.

"Olimpiyashtadion" finalga tayyor
Myunxenning "Bavariya" jamoasi uchun bu Germaniya kubogidagi 229 uchrashuv bo'ladi. Hozirgacha bo'lgan 228 o'yinning 172 tasida "gollivud" jamoasi g'alaba qozongan bo'lsa, 36 marotaba raqibidan mag'lubiyatni qabul qilib olgan. 20 o'yinda esa jamoalar murosa ko'chasini tanlashgan. To'plar nisbati - 659:234.

Germaniya terma jamoasi va "Bavariya" klubi posboni Manuel Noyer yangi rekord ostonasida turibdi. Noyer ketma-ket to'rtinchi bor Germaniya kubogi finalida qatnashadi. Hech bir futbolchiga bunday natijani qayd etish hozircha nasib etmagan.

Shuningdek, "Bavariya"ning maydondagi "boss"i Bastian Shvaynshtayger ham yangi rekord o'rnatishi mumkin. Shu kungacha Bastian "Bavariya" bilan olti bor Germaniya kubogini boshi uzra baland ko'targan. Agarda ushbu finalda ham "Bavariya" yutadigan bo'lsa, unda Shvaynshtayger uchun bu ettinchi kubok bo'ladi va u bu borada Oliver Kanni ortda qoldiradi. "Bavariya"ning sobiq posboniga olti marta Germaniya kubogida g'alabani tantana qilish nasib etgan.

Germaniya kubogi finali mezboni har doimgidek Berlin shahri hisoblanadi.
"Gerta"ning uy maydoni bo'lmish "Olimpiyashtadion"da 2020 yilgacha Germaniya kubogi finali o'tkazilishi borasida shartnoma mavjud.
Finalga chiqarilgan 76197 dona chiptaning barchasi sotib bo'lingan.
Ushbu final ko'rsatish huquqini 182 davlat sotib olgan va bugun Toshkent vaqti bilan soat 23:00dan boshlab ushbu ajoyib final to'qnashuvi boshlanadi!
Sovrin bitta va unga davogarlik qilmoqchi bo'lgan jamoa ikkita. Qaysi jamoa kuchliroq, omadli va aniq harakat qilsa, Germaniya kubogi o'sha jamoaga nasib etadi.

Ha aytgancha, bu super finalni o'tkazib yubormang! Haqiqiy futbol shiddati va jozibasi aynan shu uchrashuv ichiga berkitilgan.

Germaniya Kubogi finali.

"Borussiya Dortmund" - "Bavariya" (23:00 "Rossiya2" LIVE)

Berlin, "Olimpiyashtadion" stadioni.
Hakam: Floriyan Mayer

"Borussiya D": Vaydenfeller, Xummels, Papastatopulos, Shmelcer, Pishchek, Mxitaryan, Grosskroyc, Roys, Nuri Shaxin, Yoyich, Robert Levandovski.

"Bavariya": Noyer, Dante, Boateng, Lam, Alaba, Shvaynshtayger, Kroos, Riberi, Robben, Gyotce, Myuller.

Shahboz Beg'amov

Futbol spektakli. Nemischa final. "Borussiya D" - "Bavariya""