Yaxshi bilasiz, “Sho'rtan” oliy ligaga chiqish uchun asosiy davogar hisoblanadi. Shunday ekan, bu jamoaga qarshi maydonga tushish futbolchilar uchun o'ziga yarasha qiziq bo'ldi. O'yin yakuniga etgach, jamoa bosh murabbiyi Dilshod Nuralievdan intervyu oldik.

- Dilshod aka, g'alaba muborak bo'lsin! O'yin haqida nima deya olasiz?
- Bugun birinchi liga peshqadamiga qarshi maydonga tushdik. Futbolchilarimiz raqib o'yinchilariga nisbatan birmuncha yosh bo'lishiga qaramay, qo'rqmasdan harakat qilishdi. Qolaversa, taktik ko'rsatmalarimni ham to'g'ri bajarishgani uchun o'yinchilarga rahmat aytmoqchiman. “Sho'rtan” futbolchilarining qanday kuchga egaligi menga malum edi. Ularda oliy liga havosini ko'rgan futbolchilar ko'p. Shu bois shogirdlarimga ehtiyot bo'lib o'ynash kerakligini uqtirdim. Birinchi taymda ikkita hujumimiz omadli chiqib gol urishga muvaffaq bo'ldik. Raqibda esa aytarli imkoniyat yuzaga kelmadi. Ammo tanaffusdan keyin raqib ancha jonlandi, natijada qarshi hujumda o'ynashga majbur bo'ldik.

- Nimadir sizni qoniqtirmadimi?
- Negadir zaxiradan tushgan futbolchilar o'yinni u qadar kuchaytira olishmadi. Bu esa meni hayron qoldirdi.

- “Sho'rtan” oliy ligaga chiqish uchun asosiy davogarlardan biri. Raqib misolida o'z jamoangiz kuchini ham ko'rib oldingiz to'g'rimi?
- Men o'yindan oldin futbolchilarga aytdim: “Sho'rtan” birinchi liga klubi emas, ular oliy liga jamoasi, shunga yarasha yaxshiroq o'ynanglar. To'g'risini aytsam, jismoniy va taktik tomonlama “Sho'rtan”ning bizdan yaqqol ustun jihatlarini ko'rmadim. Lekin shunga qaramay, ularni kuchli deya olaman.

- “Sho'rtan” raqibni mensimay maydonga tushdimi?
- To'g'risini aytsam, birinchi taymda menga ham shunaqa tuyuldi. Ular yosh bolalar bilan o'ynayapmiz, bemalol yutamiz degan xayolda o'yinga chiqqan bo'lsa ajab emas. Futbolda diqqatni har doim bir erga jamlash kerak bo'ladi.

- Jamoangiz oldiga qanday maqsad qo'yilgan?
- Biz farm-klubmiz, oliy liga chiqish vazifasini qo'ya olmaymiz. Shunday ekan, maqsadimiz “Paxtakor” asosiy tarkibi va o'rinbosarlariga futbolchi etkazib berish. Shuningdek, 1995-96 yilda tug'ilgan futbolchilardan iborat O'zbekiston yoshlar terma jamoasida Jamshid Boltaboev, Javohir Siddiqov, Ibrohim Abdullaev kabi futbolchilarimiz chaqirilmoqda. Bu ham bizni xursand qilmasdan qo'ymaydi. Chunki terma jamoalar hammamiz uchun birlamchi hisoblanadi.

Dilshod Nuraliev: “Sho'rtan”ni mag'lub etganimizdan xursandmiz”