- "Қизилқум" жамоасини ғалаба билан табриклайман. Шундай ўйин бўлишини кутгандим. Бир гол бирор жамоага ғалаба келтирар эди. "Қизилқум"нинг ўйин услуби ўзгача. Жамоа доимо тўпсиз ўйнашга ҳам тайёр. Улар ўз вазиятини кутиб, бундан фойдаланишга ҳаракат қилишини билгандим. "Қизилқум" ҳимояда зич ҳаракат қилди. 10 киши бўлиб, ўз ярим майдонида яхши ўйнади. Бу ҳам футболга ҳос ҳолат. Лекин бизнинг ўз йўлимиз бор. Йўналишимиз бироз бошқача, шундай тартибли ўйин кўрсатадиган жамоаларга қарши ўйин орқали ўсишга интиламиз. Бу учун бизда етарлича имкониятлар бор. Бунинг уддасидан чиқишимизга ишонаман.
- Чинедунинг оддий вазиятларга ҳам жаҳли чиқиб кетаётганини кўрямиз. Бу унинг руҳий ҳолати ўйинларга унчалик тайёр эмаслигини билдирадими?
- Бу биринчи марта кузатилди. Бу ерда айтиш қанчалик тўғри, билмайман. Рақиби онасидан сўккан экан. Бу эса унга оғир ботибди. Бу ҳаммамизга ноқулай. Ким бўлишидан қатъий назар бундай гаплар гапирилмаслиги керак.
- "Сурхон" биринчи бўлимда кўпроқ вазиятларга эга бўлди. Иккинчи таймда эса "Қизилқум" тўп билан кўпроқ бўлди ва вазиятлар яратди. Иккинчи бўлимдаги паст ўйиннинг сабаби нимада?
- Биринчи бўлимни биз кўпроқ назорат қилдик ва вазиятларга эга бўлишимизни кутгандик. Бундай бўлмагандан кейин иккинчи бўлимда таваккал қилишга мажбур бўлдик. Футболчилардан ҳам шуни талаб қилдик. Таваккал қилмасак, иш битмасди. Тепадан Чинеду томон узатилган пасларни рақибнинг бўйи узун футболчилари қайётараётганди. Барча тўп рақибга бориб тушишни бошлагандан кейин рақибларда кўпроқ вазиятлар юзага келди. 50 кв метр зич жойдан кўра 50 кв метр очиқ жойда футбол ўйнаш осонроқ. Шунинг эвазига рақибда кўпроқ вазиятлар юзага келди. Келаси ўйинларда ўсишда давом этамиз.
- Суннатилло Абдуллажоновнинг захирага олиниши нима билан боғлиқ?
- Асад Каримовни режа қилгандик. У шундай ҳолатларда яхши ҳаракат қилади. У шундай ўйинларни соғинган, бугунги ўйинда керак эди деб ўйлагандим. Чунки у янги куч. Ҳали кўп ўйнамаган ва ниманидир исботлашга ҳаракат қилишини кутгандим. Ричард Фрайдей орқали ўйинни тезлаштиришни режалаштиргандим. У орқали биз қанотдан пасларни кўпайтиришимиз керак эди. Мақсадимиз гол уришми, бунинг учун ҳаракатни бошлаш керак эди. Кўп ҳаракат қилган бўлсак-да, яхши вазиятларимиз бўлмади. Марказда рақиб таркибида 6 футболчи ўйнади ва бу бизга қийинчилик туғдирди. Бу футбол. Рақиб 8 киши ҳимояда турса ҳам гол урилиши мумкин.
Мухлислардан узр сўрайман. Бу мағлубиятни бўйнимга оламан. Мен ҳам ўсишда давом этишим керак. Келаси ўйинлар осон бўлмайди. Барчамиз бир мақсад йўлида ҳаракат қилишимиз керак.
