– Рустам, терма жамоага энг охиргилардан бўлиб етиб келдингиз. Парвозлардан чарчаб қолмадингизми?
– Йўқ, чарчоқлар чиқди. Дам олишга улгурдик.
– Муҳим ўйин арафасидамиз. Ўтган ўйинни дисквалификация туфайли ўтказиб юбордингиз. Томошабин сифатида ўйинни кузатиш қанчалик қийин бўлди?
– Жуда қийин. Сабаби, жамоага ёрдам бера олмайсиз. Бу икки карра қийин.
– БАА саралаш бошида Қатарни сенсацион тарзда мағлубиятга учратганди. Иккала жамоа ҳам бир-бирига яқин...
- Сенсация демаган бўлардим. Чунки иккала жамоа ҳам бир-бирига яқин жамоа. Ўша ўйинда исталган жамоа ғалаба қозониши мумкин эди.
- Қатар жамоасини қайси жиҳатларидан хавфсираш керак? Ўз навбатида бизнинг улардан қандай устун жиҳатимиз бор?
- Жамоавий ўйин бизда кучлироқ. Футболчиларимизда ўйин амалиёти ҳам кўпроқ. Шуни устунлик жиҳатимиз десак бўлади.
- Остон Ўрунов Қатарга қарши ўйинда жароҳат сабаб майдонга туша олмайди. Жалолиддин Машариповнинг ҳам соғлиғида муаммолар бўлиши мумкинлигини кўряпмиз. Олдинги чизиғимиз сал бўлса ҳам хавотирга соляптими?
- Йўқ, ўйлайманки Машарипов майдонга тушади. Йигитлар Остонни ўрнини билдирмасликка ҳаракат қилишади. Уни ўрнини босадиган ўйинчиларимиз бор.
- Ўзингизни ҳолатингиз ҳақида гапирсангиз. Охирги ўйинларда мунтазам майдонга тушяпсиз...
- Мени ҳолатим яхши. Кўз тегмасин, кайфиятим ҳам яхши. Ўйиндан кейини ҳам шу кайфиятда қоламиз деб умид қиламан.
