- Ўйин ҳақида фикрингиз?
- Янги мавсум бошлангани билан барчани табриклайман. Ғалаба қозонган бўлсак-да, ўйин жуда оғир кечди. Очилиш учрашуви бўлгани боис йигитларда босим сезилди. Рақиб ҳам бизни ўз ўйини билан ҳайрон қолдирди. Биринчи бўлимда тўп кирита олмаганимиз учун жамоам асабий бўла бошлади. Лекин иккинчи бўлимда иккита гол уришга эришдик. Биринчи ўйин бўлгани учун яхши футбол намойиш эта олмадик.
- Мирзабек Дарябаевнинг бугунги ҳаракатини қандай баҳолайсиз?
- Мирзабек яхши футболчи, у ҳақида кўп илиқ фикрлар билдириш мумкин. Унга биринчи бўлимдан сўнг худди катталардек ўйнашинг керак, ёшлик ортда қолди дедим. Шу пайтгача иккинчи, биринчи лигаларда тўп тепиб юрган футболчи бирданига зўр бўлиб қолмайди. Ҳаракат қилса ҳали ўзини кўрсатади.
- Рақиб ўйинига муносабатингиз?
- Айтиб ўтганимдек, рақиб бизни чин маънода ҳайрон қолдирди. "Республика ФА" жамоаси айниқса ҳимояда кучли ўйнади. Қарши ҳужумларда ҳам яхши ҳаракат қилди. Вақт ўтиши билан бу жамоа кўп тажриба тўплаб боради ва Пролигада рақобатбардош жамоага айланади.
