Kun doirasidagi 3 uchrashuvning dastlabkisi Surxondaryoda “Surxon” – “Qo'qon-1912” jamoalari o'rtasida bo'lib o'tdi. Durang natija qayd etilgan bahs haqida so'z yuritamiz.

Zerikarli 1-bo'lim

O'yinning ilk daqiqalari shiddatli tarzda boshlandi. Ko'rinishidan murosasiz kechadigan bahsning 8-daqiqasida qo'qonliklar burchak zarbasiga ega chiqishdi. Burchakdan uzatib berilgan to'pni Muhammadanas Hasanov darvozaga yo'lladi, biroz ozgina noaniq bo'ldi. Aslida, shundan so'ng har ikki jamoa ham hujumlarga o'tib turishdi, lekin ularning xavfliligi haminqadar edi. Albatta, bunga Termizdagi yomg'ir ham o'z tasirini o'tkazgan bo'lishi mumkin, biroq o'sha kuni jamoalar 1-bo'limni shu tarzda o'tkazishdi.

1-bo'limning aksi: Shiddatli tarzda o'tgan 2-bo'lim haqida

Jamoalar ko'rinishidan barchasini 2-bo'limga olib qolganga o'xshab maydonga tushishdi. “Qo'qon-1912” jamoasi dastlabki daqiqalardanoq hujumlarga zo'r berdi. Bu esa tabiiyki, golga olib keldi. “Surxon” futbolchisi Vladimir Budanya Shoxnazar Norbekovga nisbatan o'z jarima maydonchasi ichida qo'pollik ishlatdi. “Sport” telekanali orqali tomosha qilgan muxlis, futbolchi, hakam yoki stadiondan o'yinni ko'rgan muxlisdan farqi qolmay, takroriy lavhani ham ko'ra olmadi. Shu bois, qanchalik darajada qo'pollik ishlatilganini bilmadik, biroq bir ko'rishdan bu penaltiga o'xshadi. Uni amalga oshirgan Murod Xolmuhammedov esa mo'ljalda adashmadi – 0:1.

Goldan so'ng “Surxon” jamoasi azolari hujumlarga yanada zo'r berdi. Qator hujumlar, bir necha vaziyatlar yuzaga keltira oldi jamoa. Hatto, bir vaziyatda penaltiga o'xshash holat ham bo'lgandi, biroq “Sport” kanalidagi takroriy lavhalar berilmagani yana pand berdi. Biz esa shunchaki ovozlardan surxondaryolik muxlislarning hakamni odatiy so'kishini eshitdik. 77-daqiqada Asror G'ofurov katta sahnaga chiqdi. O'ng qanotdan uzatib berilgan to'pni G'ofurov boshi bilan darvozaga yo'lladi – 1:1.

Hisob tenglashcha qo'qonliklar ham, mezbonlar ham oldinga o'tishga ko'paytirishdi. Maydon “yondi”, deya olmaymiz-ku, biroq yaxshi o'yin bo'ldi ancha. Hakam tomonidan qo'shib berilgan vaqtlarda esa Murod Bobojonov barchasini hal qilishi mumkin edi. 2 daqiqada uzoq masofadan ikki marta kuchli zarba berdi. Biroq birinchisida to'p darvoza ustuni ustidan, keyin esa darvoza yonginasidan o'tib ketdi. Shunday natija va o'yin bilan uchrashuv o'z nihoyasiga etdi.

Murabbiylarning fikri

Rifat Akramxo'jaev: "Birinchi goldan keyin ustunlik biz tarafga o'tdi"

Baxtiyor Ashurmatov: "Afsuski, muxlislarimiz kutgan natijani qo'lga kirita olmadik"

4-tur oldidan

1 aprel kuni “Surxon” jamoasi Jizzaxda “So'g'diyona” mehmoni bo'ladi. Hozirgi kunga qadar jizzaxliklar 3 o'yindan so'ng 2 g'alaba, 1 durang natija bilan 7 ochkoga ega. “Surxon” esa mazkur bahsdan so'ng 4 ochkoga ega.

2 aprel kuni “Qo'qon-1912” jamoasi o'z uyida Toshkentning “Bunyodkor” jamoasini qabul qiladi. Ushbu o'yindan keyin qo'qonliklar 1 g'alaba va 2 durang natijasi bilan 5 ochkoga ega.

Coca Cola Superliga, 3-tur
SURXON – QO'QON-1912 - 1:1
20 mart 2021 yil. Termiz. "Surxon" stadioni. 16:15
Hakamlar: Rustam Lutfullin, Sanjar Shoyusupov, Alisher Usmonov, Ilya Ilin
Nazoratchi: Marat Ismoilov
Komissar: Axmed Tillaev

Gollar: Murod Xolmuhammedov 52 penalti, - 0:1. Asror G'ofurov 77, - 1:1 (Alisher Salimov).

"Surxon": 13.Akrom Xo'jaev, 5.Jasurbek Yoqubov, 6.Alisher Salimov, 7.Islom Toshpo'latov (8.Jahongir Ahmadov, 76), 10.Murod Bobojonov, 11.Zohir Pirimov (21.Javohir Esonqulov, 69), 14.Jasur Xolto'raev (38.Muhammad Ali Abdurahmonov, 69), 15. Vladimir Bubanya, 20.Husniddin G'ofurov, 66.Behruz Shaydulov, 77.Asror G'ofurov.
Zaxira: 1.Azamat Ahmedov, 3.Kamoliddin Ashurov, 9.Nizomjon Norov, 70.Ibrohim Yo'ldoshev.

"Qo'qon-1912": 1.Muzaffar Abdullaev, 3.Bobirjon Akbarov, 7.Asadbek Sobirjonov (13. Sardor Azimov, 72), 8.Farhod Bekmurotov, 10.Shoxnazar Norbekov, 15.Oybek Rustamov (11. Mo'min Meliev, 81), 22.Muhammadanas Hasanov, 23.Aleksandr Merzlyakov, 33.Ivan Yosovich, 70.Murod Xolmuhammedov, 91.Yakuba Bamba (20. Iqbol Malikjonov, 64).
Zaxira: 16.Eldor Adhamov, 5. Slavko Lukich, 14. Avaz Mamatxo'jaev, 99. Andrey Sidorov.

Ogohlantirishlar: Oybek Rustamov 15, Ivan Yosovich 65, Asror G'ofurov 67, Farhod Bekmurotov 82, Muzaffar Abdullaev 90+2.

Og'abek Samisov

Foto: Sobitjon Xodjamqulov

Zerikarli 1-bo'limdan shiddatli 2-bo'limga qadar: “Surxon” – “Qo'qon-1912” o'yini haqida