Katalonchadan tarjima qilinganda yangi maydon manosini beruvchi ushbu arena 1957 yilning 24 sentyabrida foydalanishga topshirilgan. Ko'pchilik ushbu stadionni "Nou Kamp" deb ham atashadi, ammo bu noto'g'ri emas. Stadion nomini teskari aytish inglizlar tomonidan o'ylab topilgan.

O'z bag'riga 99 354 kishini sig'dira oladigan stadion Evropadagi eng yirik, dunyodagi ikkinchi o'rinda turuvchi arena hisoblanadi (birinchi o'rin Shimoliy Koreyadagi "1-may" stadioniga tegishli, sig'imi - 114 000 kishi).

Ushbu arena qurilishi 1954 yil 28 mart kuni boshlangan. "Barselona"ning avvalgi uy stadioni bo'lgan "Camp de Les Corts"da muxlislar sig'imini ko'paytirib bo'lmasdi. "Kamp Nou"ni qurish Franchesk Mityans, Xosep Soteras va Lorenco Garsia-Barbonlardan tashkil topgan arxitektorlar guruhiga topshirilgan.

"Kamp Nou"dagi birinchi yirik uchrashuv 1972 yilda bo'lib o'tgan. O'shanda "Renjers" hamda "Dinamo" (Moskva) o'rtasida Evropa Kuboglari sohibi final uchrashuvi o'tkazilgan va shotlandiyaliklar sovrinni qo'lga kiritishgan.

1975 yilda stadionga elektron tablo o'rnatilgan.

"Kamp Nou" stadioni 1982 yilda Ispaniyada bo'lib o'tgan jahon chempionatining 5ta uchrashuvini qabul qilgan. O'sha mundialda arena bag'riga 121 749 muxlisni sig'dira olgan. Ushbu stadionda jahon chempionatining quyidagi bahslari bo'lib o'tgan.

Sana	Jamoa 1	Hisob	Jamoa 2
1982 yil 13 iyun	Argentina	0:1	Belgiya
1982 yil 28 iyun	Polsha	3:0	Belgiya
1982 yil 1 iyul	Belgiya	0:1	Sobiq Sovet Ittifoqi
1982 yil 4 iyul	Sobiq Sovet Ittifoqi	0:0	Polsha
1982 yil 8 iyul	Polsha	0:2	Italiya

Bir yil avval "Barselona" rahbariyati "Kamp Nou" stadionini rekonstrukciya qilish haqida qaror qabul qilgan edi. Rekonstrukciya ishlari 2017 yildan boshlanib, 2021 yilgacha yakunlanishi kerak.

Yuragiga "Mes que un club" yozuvi tushirilgan stadion bugun 60 yoshga to'ldi