Jamoa bosh murabbiyi Timur Kapadze yig'in jarayoni, selekciya ishlari, moliyaviy barqarorlik hamda O'zbekiston milliy terma jamoasining tayyorgarlik rejalari xususida fikrlari bilan o'rtoqlashdi.

- Bu ikkinchi yig'in. Yangi yilgacha dastlabki mashg'ulotlarni olib borgan edik. Eng muhimi, barcha futbolchilar sog'-salomat. Albatta, bu holat xursand qiladi. Oldimizda qiziqarli chempionat kutmoqda. 14 yanvardan Turkiyada yig'inni davom ettiramiz. Hozir futbolchilarning jismoniy holatini tiklashga etibor qaratyapmiz. Yaxshi tayyorgarlik ko'ramiz.

- Barcha jamoalar selekciya ishlari bilan band. "Navbahor" tarkibi qay darajada shakllandi?

- Tarkibimiz ancha shakllandi, kerakli futbolchilarni jalb qildik. Hozircha yana izlanyapmiz. Legionerlar ham, mahalliy futbolchilar ham ko'rib chiqilmoqda. Umuman olganda, jamoa o'zagi shakllangan. Taktik ishlanmalar va jismoniy holat bo'yicha ham munosib tayyorgarlik olib boramiz.

- "Navbahor"da kutilmagan moliyaviy muammolar bo'lishi mumkin, degan gaplar bor. Bu masalada rahbariyat bilan gaplashdingizmi?

- O'ylaymanki, bunday bo'lmaydi. Rahbariyat bilan gaplashganmiz. Namanganda futbolni qanchalik yaxshi ko'rishlarini bilamiz. Klubning o'ziga yarasha tarixi bor, muxlislari ham O'zbekistondagi eng yaxshilardan biri. Shu bois bunday muammolar bo'lmaydi, deb ishonaman. Oldimizga qo'yilgan vazifani bajarishda rahbariyat to'liq qo'llab-quvvatlaydi.

- O'zbekiston milliy terma jamoasi Jahon chempionatiga yaxshi tayyorgarlik ko'rish maqsadida may oyining dastlabki sanalarida yig'inni boshlaydi. Agar terma jamoada siz yoki mahalliy murabbiy bo'lganida ham bunday imkoniyat yuzaga kelarmidi?

- Bu savolga aniq javob berish qiyin. Oldimizda Jahon chempionati turibdi. Bu juda muhim musobaqa - 34 yil deganda mundialga chiqdik. Murabbiylar shunday reja tuzishgan va O'FA buni qo'llab-quvvatlagan. Albatta, chempionat uchun biroz noqulaylik tug'dirishi mumkin, chunki tanaffus bo'ladi. Ammo terma jamoa har doim ustuvor hisoblangan. Muhimi, bu qaror foydaga ishlasin. Biz muxlis sifatida qo'llab-quvvatlaymiz va yaxshi natija kutamiz.

Timur Kapadze: "O'ylaymanki, "Navbahor"da moliyaviy muammolar bo'lmaydi"