Unda O'zbekiston U-23 termasi bosh murabbiyi Timur Kapadze ishtirok etdi.

"Saralash bosqichi boshlangani bilan barchani tabriklayman! Qisqa vaqt ichida tayyorgarlik ko'rishga to'g'ri keldi, lekin shunga qaramay, uchta o'yinni yaxshi o'tkazamiz va qoniqarli natijaga erishamiz. Ertangi uchrashuv Afg'oniston terma jamoasiga qarshi. Ushbu terma jamoa haqida iloji boricha malumot to'plashga harakat qildik, ammo bu oson bo'lmadi. Nima bo'lishidan qati nazar ertaga g'alaba qozonamiz degan umiddaman", – dedi olimpiyachilar ustozi.

- Futbolchilarning ertangi uchrashuvga tayyorgarligi haqida gapirib o'tsangiz. Ular "raqibimiz Afg'oniston-ku", deya, ruhiy tomonlama bemalol o'ynashmaydimi?

- Fikrimcha, ruhiyat tomonlama hammasi joyida. Afg'onistonda ham futbol rivojlanib bormoqda. Afg'oniston yoshlar terma jamoasi CAFA turnirlarida ishtirok etib kelmoqda, terma jamoasi esa yozda bo'lib o'tgan CAFA kubogida kichik intriga yarata oldi. Afg'onistonlik ko'p futbolchilar Eron chempionatida to'p tepishadi. Ertangi o'yinga tayyormiz deb ayta olaman.

- Legionerlar holati haqida gapirib o'tsangiz...

- Eng avvalo, barcha legionerlarimiz sog'-salomat. Ular terma jamoaga biroz kech qo'shilishdi. Bir nechta futbolchimiz kecha mashg'ulotlarga qo'shildi. Vaqt kam, biroq legionerlarimizning darajasiga shubha qilmayman. Ular tez kirishib keta olishadi. Bizni uchta o'yin kutib turibdi va tabiiyki rotaciya qilamiz va barchaga imkoniyat beramiz.

- Legioner futbolchilarning o'z klublariga kam o'yin amaliyotiga ega bo'layotganini hisobga olsak, mahalliy futbolchilarimiz bilan solishtirganda o'yin ritmida farq sezilib qolmaydimi?

- Bu jihatni albatta hisobga olamiz. Ko'rib chiqamiz va qaraymiz. Terma jamoada barcha futbolchi bor kuchi bilan o'ynashi kerak. Ushbu holat terma jamoamiz o'yiniga tasir o'tkazmaydi degan umiddaman.

- Uchrashuvlarni "Jar" stadionida o'tkazish sizning taklifingizmidi yoki O'FAning?

- Bu masala kelishilgan holatda hal etildi. Hozirgi kunda maydonlarimizda muammolar bor. "Jar"da esa bunday muammo yo'q. "Bunyodkor" stadionida ham o'ynasak bo'lar edi, lekin biz ancha avval "Jar"da o'ynashimizni hal etib bo'lgandik. Yagona muammo stadionning sig'imida bo'lishi mumkin.

Shu tariqa, matbuot anjumani yakunlandi. Tez orada boshqa terma vakillari ishtirokida kechgan savaol-javoblarni etiboringizga havola qilamiz.

Malumot uchun, O'zbekiston olimpiya terma jamoasi saralash bosqichi "E" guruhida Afg'oniston, Gonkong va Eron bilan bahs olib boradi. O'zbekistonning dastlabki turda ertaga Afg'oniston bilan o'ynaydi. Uchrashuv soat 19:00 da "Jar" stadionida start oladi.

Timur Kapadze: "Afg'oniston terma jamoasi haqida iloji boricha malumot to'plashga harakat qildik, ammo bu oson bo'lmadi"