Ўйиндан кейин "ТерДУ" бош мураббийи Элдор Бойматов матбуот анжуманида иштирок этди.
- Ўйин ҳақида фикрингиз?
- Бугун ҳар икки жамоага ғалаба жуда зарур эди, чунки турнир жадвалида охирги ўринларда кетяпти. Қийин ўйин бўлишини билардик ва шундай бўлди. Нукусда зафар қучиш қийин эканини биламиз. Бугун бир очко билан кифояландик, шунга ҳам хурсандмиз. Йигитларга раҳмат айтиб қоламан.
- Жамоангиз илк бор Пролигада қатнашяпти. Ушбу мусобақа даражасини қандай баҳолайсиз?
- Пролигада ўйинлар яхши бўляпти. Ўтган йил Суперлига чиқиш учун бир-икки жамоа курашган бўлса, бу йил 4-5та шундай жамоа бор. Ёш жамоалар ҳам бор. Даража ўсган ва биз ҳам ўз савиямизни кўтариб борамиз.
- Жамоангизнинг мақсади?
- Маҳаллий футболчиларни Суперлига даражасига тайёрлаш. Ўйинчиларимиздан кимдир Суперлигада ўйнаб кетса бундан хурсанд бўламиз.
- Кейинги учрашувларда ғалаба қозониш учун нимага кўпроқ эътибор берасизлар?
- Кучли жамоалар билан ҳам тенгма-тенг ўйнаяпмиз, лекин вазиятларни голга айлантира олмаяпмиз. Гол урсак ҳаммаси яхши бўлиб кетади.
