1980 йилда "Милан" ва "Лацио" B Серияга тушириб юборилган, 2006 йилда эса – "Ювентус". Энди эса Милан прокуратураси ва хусусан Маурицио Ашьоне Милан миллий судьялар комиссияси раҳбари Жанлука Роккини ўйинларни сохталаштириш ва "Интер"га ёрдам берганликда расман айбламоқда. Ўзи нима бўлди ва 20 йил олдинги воқеа такрорланиши мумкинми?
Таҳлил қиламиз.
Рокки "Интер"га “қулай” ҳакамларни тайинлаган эмиш. Аммо миланликлар ўша учта ўйиннинг иккитасида мағлуб бўлган.
Ҳа, мана шундай парадокс. AGI агентлиги ўтган мавсумдаги икки ҳолат ҳақида хабар бермоқда.
2024 йил 6 январь. А Сериянинг 19-тури, "Интер" – "Верона" ўйини (2:1). Давиде Фраттези 90+3-дақиқада ғалаба голини урди, бироқ ундан олдин Алессандро Бастони тирсак билан Ондрей Дуденинг юзига урган. AGI маълумотларига кўра, VAR ассистенти бош ҳакам Микаэль Фаббрини мониторга чақиришни қасддан рад этган.
Ушбу воқеа Рокки фаолияти билан боғланмоқда. Терговчиларнинг фикрича, Рокки шундай тизим яратганки, VAR’да ишлаганлар рейтингдан тушиб қолиш хавфи туфайли "Интер"га қарши қарор қабул қилишдан қўрққан.
2025 йил 20 апрель. А Сериянинг 33-тури, "Болонья" – "Интер" ўйини. Тергов материалларига кўра, Рокки бундан бироз олдин Италия Кубогидаги Милан дербисини (1:1) стадионда томоша қилиб, Андреа Коломбони "Болонья"га қарши ўйинга тайинлашни "ҳал" қилган.
Коломбо "Интер"га ҳатто дуранг ҳам олиб келмади: қўшимча вақтда Риккардо Орсолини "қайчи" усулида гол уриб, "Интер"нинг чемпион бўлишига тўсқинлик қилган.
23 апрель. Италия Кубоги ярим финалининг жавоб ўйини: "Милан" – "Интер". Айбловчи томоннинг фикрича, Рокки биринчи ўйин (1:1) вақтида Коломбони "Болонья" билан ўйинга тайинлаш билан бирга, янги дербига Даниэле Доверини ҳам тайинлашга келишган.
2025 йил 1 март. А Сериянинг 27-тури, "Удинезе" – "Парма" ўйини (1:0). Ягона гол пенальтидан урилган. Нима учун Рокки чемпионатнинг ўртача жамоасига ёрдам бериши керак эди – ўша мавсум "Удинезе" 12-ўринни эгаллаган. Катта эхтимол билан улар қайсидир жамоага эмас, балки ўйин натижасига таъсир қилишга ҳаракат қилган.
“Il Gazzettino” нашри VAR марказидан видеоёзувни эълон қилди. Ўйиннинг бош ҳаками Фабио Мареска дастлаб 11 метрликни белгилашни истамаган. Видеоассистент Даниэле Патерна ҳам шундай деб ўйлаган ва шундай деган: "Қўлнинг ҳолатига қаранг. У танага ёпишганга ўхшайди". Бироқ кейин Патерна кадрдан ташқарида кимгадир қараб, маслахатини эшитган ва Марескани мониторга чақирган. Қарор ўзгарган. Таъкидланишича, ўша кимса – Рокки. Унинг собиқ ёрдамчисининг айтишича, Жанлука "тез туриб, бир неча марта ойнани тақиллатган".
“Sky Sport Italia” нашрига кўра, дастлабки тергов бир йил олдин собиқ ёрдамчи ҳакам Доменико Роккининг хатидан бошланган. У Италия ҳакамлари ассоциациясига ўзининг ишига нисбатан жуда қаттиқ баҳо берилаётганидан шикоят қилиб, буни шундай қолдирмаслигини айтган. Роккини сўроқ қилишган, иш ёпилган. Аммо Доменико "уя”ни қўзғатиб юборган.
Яна VAR раҳбари (A ва B Серия) Андреа Гервазони ҳам фирибгарликда айбланмоқда. “La Gazzeta dello Sport” ўтган мавсум B Сериядаги "Салернитана" – "Модена" (1:0) ўйинини эсга олди, унда Гервазони худди Рокки каби VAR ассистентига таъсир қилган.
Андреа ихтиёрий равишда истеъфога чиқди. Рокки ҳам шундай қилди, лекин ўзининг айтишича, вақтинча. Роккининг навбатдаги сўроғи 30 апрелга белгиланган.
"Бугунги воқеалар муносабати билан Италия ҳакамлари ассоциацияси билан келишилган ҳолда ва Миллий судьялар комиссияси тинч ишлаши учун мен дарҳол лавозимдан кетаман. Бу оғриқли ва оғир қарор, лекин оилам билан маслаҳатлашган ҳолда қабул қилинган. У суд жараёнининг тўсиқсиз ўтишини таъминлайди. Мен оқланаман ва янада кучлироқ бўлиб чиқаман, бунга ишонаман", - деб фикр билдирган Миллий судьялар комиссиясининг собиқ раҳбари Рокки.
"Интер"" кечагача жим турди, аммо ниҳоят баёнот берди. Италияда яна нималар дейиляпти?
Клуб раҳбарияти кечагача жим турган. ОАВ бунга раҳбарият айбловлардан шокка тушиб, ички музокаралар ўтказаётгани билан изоҳлаган. Сукунат ниҳоят якунланди. "Торино" билан ўйин олдидан клуб президенти чиқиш қилди.
"Биз ҳамма нарсани матбуотдан биламиз. Бу баёнотлар бизни ажаблантирди: бизда ёқадиган ёки ёқмайдиган ҳакамлар йўқ. Биз ҳалол иш тутганимизни биламиз. Бу энг муҳим жиҳат бўлиб, ҳаммани тинчлантириши керак. Бундан шикоят қилмоқчи эмасман, бироқ ўтган мавсумда бизга қарши қабул қилинган қарорлар бўлган. Ҳатто "Интер" – "Рома" ўйинидаги пенальти каби очиқ-ойдин қарорлар ҳам. "Милан" билан Италия Кубогидаги биринчи ўйиндаги айбловлар? Улар мени ҳайратда қолдирди, мен ҳеч қандай боғлиқлик топа олмаяпман. Буларнинг барчасини матбуотдан билдим ва тўлиқ жавоб бердим. Бошқа ҳеч нарса демоқчи эмасман. Биз Туриндамиз, ўйин ўтказиш ва уйга ҳақли Скудеттони олиб кетиш учун. Биз ҳалол ишлаганмиз”, – деб баёнот берган "Интер" президенти Беппе Маротта.
Спорт вазири Андреа Абоди огоҳлантирди: агар айбловлар исботланса, жазо муқаррар:
"Мен ҳам сиз каби Милан прокуратураси терговида пайдо бўлаётган тафсилотларни ўқияпман. Умид қиламанки, тез орада расмий маълумот оламан. Агар кимнингдир қонунга хилоф ҳаракатлари аниқланса, оқибатлари муқаррар бўлади".
Италия футбол федерацияси прокурори Жузеппе Чине бир йил олдин Доменико Роккининг Жанлука Роккига қарши шикоятини рад этган эди. Ҳозир ўзи ҳам тергов остида. У ўшанда Жанлука Рокки ҳаракатларида ҳеч қандай тақиқланган нарса топилмаганини, агар янги далиллар пайдо бўлса, бу кўп нарсани ўзгартиришини айтган.
Ва охирида А Серия президенти Эцио Симонеллининг сўзларини келтирамиз. У шошқалоқ хулосалардан огоҳлантирди:
"Таъкидламоқчиманки, бу ҳам бошқа ҳолатлар каби терговчиларнинг айбловларидир ва ҳар ким уларни демократик муҳокамалар доирасида шундай қабул қилиши шарт. Шошқалоқ мулоҳазалар ёки хулосалар қабул қилиш мумкин эмас, чунки биз ҳақиқатни аниқлаш учун тергов тугашини виждонан кутиб турибмиз.
Биздан ҳеч ким ишнинг тафсилотларини билмайди ва бизнинг бевосита вазифамиз – қарор чиққунга қадар кафолатчи бўлиш. Акс ҳолда А Серия тизими ва бутун Италия футболининг обрўсига зарар етказиш хавфи бор".
