Bronza medallari uchun kurashayotgan Namanganning "Navbahor" jamoasi uyida sovrinli o'rinlardagi raqobatchisi Qarshining "Nasaf" klubini mehmon qiladi. Andrey Kanchelskis va Ro'ziqul Berdiev birinchi davradagi o'zaro hisob-kitob hamda bronda medallari uchun bo'ladigan to'qnashuvda qaysi jamoa kurashdan chiqib ketishini hal etishadi. Ehtimoliy g'alaba har ikkala jamoaga uchinchi o'rin uchun bellashuvda imkoniyatni saqlab qolishlarini kafolatlaydi. Aksincha, mag'lubiyat esa bu kurashda imkoniyatni keskin pasaytirib yuboradi. Durangdan esa hech bir jamoa manfaatdor bo'lmaydi.

Ushbu jamoalarning birinchi davradagi Qarshida kechgan bahsida Kasyanning yagona goli "Navbahor"ga g'alabani taqdim etgandi. Ro'ziqul Berdiev o'sha mag'lubiyat uchun Kanchelskisdan revansh olishga urinib ko'radi. "Nasaf" esa joriy mavsumda Namanganda "Navbahor" mehmoni bo'lishga ulgurdi va o'shanda kubok doirasidagi qarama-qarshilikda Deyan Jurjevich boshqaruvi paytida "Navbahor"dan alamini olishga muvaffaq bo'lgandi.

Kunning yana bir "qaynoq" to'qnashuvi Olmaliqda kechadi. Birinchi davrani muvaffaqiyatsiz o'tkazgan, ammo ikkinchi davrada nisbatan kuchaygan AGMK qatorasiga 3 yil chempion bo'lgan "Lokomotiv"ni mehmon qiladi. Mirjalol Qosimov va Samvel Babayanning murabbiylikdagi o'zaro ilk to'qnashuvi mazkur o'yin afishasini bezaydi. Har ikkala jamoa uchun ham g'alaba juda zarur. AGMK xavfli hududdan allaqachon uzoqlashgan bo'lsa, ayni damda turnir jadvalidagi mavqeini tobora yaxshilash yo'liga tushgan. "Loko" esa hozirda egallab turgan ikkinchi o'rni va OCHL pley-off yo'llanmasini beradigan pog'onani bo'shatmaslik ishtiyoqida. Shu boisdan ham "Lokomotiv" uchun mazkur o'yinda qo'lga kiritilajak ochko juda muhimligi bilan ahamiyatli. Aks holda "Lokomotiv"ning kumush yoki xattoki bronza medallaridagi imkoniyati pasayib ketish ehtimoli mavjud. Shu boisdan ham mazkur qarama-qarshilik qiziqarli va keskin o'tishi kutilmoqda.

Qayd etish kerakki, Babayan jamoaga kelgach "Lokomotiv" hali biror marta safarda g'alabani tantana qilgani yo'q. AGMK esa chempionat doirasida ketma-ket g'alabali seriyani taqdim etmoqda. Dastlab "Nasaf", keyin esa "Bunyodkor" to'sig'i zabt etildi.

Turning so'nggi bahsida chempionlikni allaqachon rasmiylashtirgan "Paxtakor" joriy mavsum birinchi bo'lib ulardan ochkoni tortib olgan va g'alabali seriyaga chek qo'ygan "Surxon" bilan Toshkentda kuch sinashadi. Qizig'i, hozirga qadar o'tkazilgan 22-tur o'yinlari 11tasini "Paxtakor" uyda va yana shunchasini mehmonda o'tkazgan. Qo'lga kiritilgan g'alaba va durang ham mos ravishda bir xil 10 g'alaba uyda, 10 yutuq safarda rasmiylashtirilgan. Shuningdek, uy va mehmonda bir marotadan durang o'ynalgan. Qo'lga kiritilgan ochkolar soni ham bir xil: 31dan.

Nazariy jihatdan "Surxon"da ham bronza medali uchun kurashish imkoniyati saqlanib turibdi. Mazkur turda "Bunyodkor"ning ochko yo'qotishi va hozirda uchinchi pog'onada mustahkam turgan "So'g'diyona" bilan termizliklarning o'zaro o'yini borligini inobatga olsak, ehtimoliy g'alaba "Surxon"ga yaxshi imkoniyat eshigini ochadi. Lekin buning uchun chempion "Paxtakor"dan safarda kamida ochko olish vazifasini uddalashga to'g'ri keladi. Bu esa oson yumush emasligi aniq.

Superligada tur yakunlanadigan kun: Qosimov va Babayanning ilk to'qnashuvi, Namanganda bronza uchun kurash hamda chempion mehmoniga aylanadigan "Surxon"