Olmaliqliklar bugun o'z qarorgohlaridagi so'nggi mashg'ulotni olib boradi. "Al Arabi" raqiblik qiladigan o'yinda g'alaba "konchilar"ni o'z tarixida ikkinchi bor OCHL guruh bosqichiga olib chiqadi. Raqib jiddiy biroq bu g'alabadan qaytara olmaydi. O'zbekiston nomidan maydonga chiqadigan klubga esa barcha birdek muxlislik qiladi. Biz esa tayyorgarlik va raqib haqida OKMKning eronlik legioneri Siyavash Haqnazariyning fikrlari bilan qiziqdik.

- O'ylaymanki, bu uchrashuvga ruhan va jismonan tayyormiz. Avvalgi raqibga qarshi o'yindagi g'alabadan keyin o'zimizga bo'lgan ishonch kuchayib borayotganini sezyapmiz. Fikrimcha, OKMK kuchliroq raqibga qarshi yanada yaxshi o'yin ko'rsatadi. Buni so'nggi OCHL o'yini va Superliga orqali isbotladik. Ularda yaxshi sharoitlar, yuqori klassdagi futbolchilar bor. Lekin biz bor kuchimizni ishga solishimiz shart. Seshanba oqshomida maydonda borimizni beramiz.

- O'yinda g'alaba qozonish uchun imkoniyatimiz bor. Ob-havodan kelib chiqib aytganda qo'shimcha bo'limlarda qiyin bo'ladi. Ammo biz barchasiga tayyormiz. Biz 90 daqiqada o'yinni ijobiy natija bilan yakunlashga harakat qilamiz.

- Ha, barchaning etibori Saudiya Arabistoniga qaratilgan. Lekin futbolda yulduzlarni olib keldi degani, natijaga erishishni anglatmaydi. Ammo Saudiya klublari Osiyoning eng yaxshi jamoasi bo'lish uchun davogar ekanligini unutmaslik lozim. OCHLda Sharqiy Osiyo klublarini ham chempionlikka davogar, deb o'ylayman. Chunki ular uzoq vaqtdan beri futbolda barchasini to'g'ri bajarib kelyapti.

Abdulaziz Iskandarov yozib oldi

Siyavash Haqnazariy: "Al Arabi"da yaxshi futbolchilar bor. Lekin shu kuni biz ham bor kuchimizni ishga solamiz"