"Jizzaxda bizni yaxshi kutib olishgani uchun minnatdorchilik bildiraman. "Bunyodkor" uchun har bir o'yin kurashlarga boy bo'lmoqda. "So'g'diyona" ayni paytda musobaqa jadvalida ikkinchi o'rinda bormoqda va oson bo'lmasligini bilgandik. Shunga yarasha yaxshi tayyorgarlik ko'rgandik.

Ulug'bek Baqoevni anchadan beri bilaman, u terma jamoada ishlaganimda qo'l ostimda o'ynagan. U ham men kabi yutqazishni xohlamaydigan murabbiy. Ulug'bek xafa bo'lmasin, bugun biz g'alabaga ko'proq loyiq edik. Durang ham yomon emas. Barcha futbolchilarga, hatto zaxirada qolganlarga ham rahmat aytaman", - deydi Shuhrat Maqsudov.

- "So'g'diyona" jamoasidagi so'nggi yillardagi o'zgarishlar haqida nimalar deya olasiz?
- Jizzaxda doim jamoa yaxshi bo'lgan. Ayni paytdagi natijalarga Baqoevning hissasi juda katta. U futbolchilik paytida ham yutqazishni yoqtirmasdi, murabbiy sifatida ham shogirdlariga shuni singdirmoqda.

- Bugun "Bunyodkor" ikki ochko yo'qotdimi yoki bir ochko oldimi?
- Yuqorida aytganimdek bugun biz yutuqqa haqliroq edik. Gol ham urgandik, uni bekor qilishdi. Balki rostdan ham hujumchi darvozabonga urilgandir, bilmadim.

Shu o'rinda "O'zbekneftgaz" AJ boshqaruv raisi Abdullaev Mehriddin Razzoqovichga alohida rahmat aytaman. Homiylik klubga yana qaytarib berildi va kuni kecha oldingi g'alabalar uchun mukofot pullari berildi. Bu esa futbolchilarga qo'shimcha motivaciya ekanligi shubhasiz.

- O'yinga ozgina qolganida VAR tizimi ishlamasligi haqida xabar chiqdi...
- To'g'risi VAR va hakamlar haqida gapirishni istamayman. Tinch yuribmiz, tinch yuraqolaylik.

Shuhrat Maqsudov: "Tinch yuribmiz, tinch yuraqolaylik..."