Ushbu uchrashuvdan so'ng "temiryo'lchilar" futbolchisi Sanjar Shoahmedov o'z fikrlarini bildirib o'tdi.

- Avvalam bor g'alaba bilan tabriklayman. Ushbu bahsda g'alaba qozonish "Lokomotiv" uchun qanchalik qiyin bo'ldi?

- G'alaba bilan tabriklagan barcha muxlislarimizga rahmat aytaman. "Al Vahda" bilan o'yinda ortga yo'l yo'q edi. Bizni faqat g'alaba qoniqtirardi. OCHL musobaqasida ham superliga bahslarida ham hech qanday natija qayd etmayotgan edik. Barcha murabbiylar shtabi va futbolchilar maydonda borimizni berib harakat qilamiz degan maqsadda o'yin olib bordik. Yakunda maqsadimizga erishdik.

- Bu safar ham yirik hisobda g'alaba qozondinglar. Raqib jamoa zaif o'yin ko'rsatdimi yoki "Lokomotiv" kuchli o'ynadimi?

- "Al Vahda"ga qarshi uchrashuv uchun ularning o'yinlarini ko'p bor tahlil qildik. Qaysi futbolchi maydonda qanday harakat qilishini kuzatib bordik. Ularning kuchli va kuchsiz tomonlarini o'rganib chiqdik. Murabbiylarimiz bizga to'g'ri ko'rsatma berdi va futbolchilar borini berib o'ynadi. shuning uchun ham g'alaba qozondik, deb o'ylayman.

- Balaj Djudjak maydonga tushmagani "Al Vahda" uchun qiyin bo'ldimi?

- Balaj Djudjak "Al Vahda"ning etakchi futbolchisi hisoblanadi. Ushbu futbolchini barcha yaxshi biladi, juda ham kuchli futbolchi. Bunday futbolchining "Al Vahda"ga yordam bera olmagani jamoa uchun qimmatga tushdi, deb o'ylayman. Agarda Djudjak maydonga tushganida "Al Vahda"ga yordam bergan bo'lardi.

- "Al Duhail" jamoasi "Zoboxan" bilan uchrashuvda g'alaba qozondi va qaysidir manoda sizlarga yordam berib yubordi. Bunday qanday fikr bildira olasiz?

- Biz "Al Vahda"ni mag'lub etib "Zobohan" "Al Duhail"ni mag'lub etganda taqdirda biz o'z uyimizda "Zobohan"ni mag'lub etishimiz kerak bo'lardi. "Al Duhail" g'alaba qozonib biroz bo'lsada bizga yordam bergan bo'lishi mumkin. "Al Duhail" mag'lub bo'lganida biz o'z uyimizda "Zobohan"ni yirik hisobda mag'lubiyatga uchratishimiz kerak bo'lardi. Hozir esa bizni "Zobohan" bilan bo'ladigan o'yinda istalgan hisobdagi g'alaba qoniqtiradi. Shu tomondan "Al Duhail" bizga yordam berdi.

- OCHLda keyingi o'yinni Aliboev o'tkazib yuboradi. Bu jamoa uchun jiddiy yo'qotishmi?

- Bu futbol. Futbolda sariq, qizil kartochkalar bo'lib turadi. Aliboev ham ataylib sariq kartochka olmadi. Albatta, Aliboevning "Zoboxan"ga qarshi uchrashuvda maydonga tusha olmasligi biz uchun katta yo'qotish.

- OCHL Guruhinglardagi raqiblar Lokomotiv uchun kuchli edimi?

- "Lokomotiv" OCHLdagi barcha jamoalarni hurmat qilib maydonga chiqadi. Guruhimizdagi barcha jamoalar Osiyoda o'z o'rniga ega kuchli jamoalar. Biz kuchli guruhdan joy olganmiz.

- Lokomotiv ichki chempionatda 2ta uchrashuvda mag'lub bo'ldi. "Al Vahda" bilan o'yinda g'alaba qozondi. Ushbu g'alaba keyingi o'yinlarda ham g'alaba qozonish uchun qandaydir kuch beradimi?

- Qo'lga kiritilgan ushbu g'alaba keyingi o'yinlarda ham bizga ancha kuch beradi, deb o'ylayman. Nasib qilsa kelasi o'yinlarda muxlislarimizga g'alabalarimizni taqdim etamiz.

- Oxirgi paytlarga "Lokomotiv"ga nima bo'layotgan edi?

- Bu futbol. Kimdir g'alaba qozonadi yana kimdir mag'lub bo'ladi. "Lokomotiv"ga hech nima bo'lmadi. Barcha futbolchilar bor kuchi bilan o'ynayotgan edi. Balki omadimiz kelmayotgandir. Nasib qilsa qolgan o'yinlarda yaxshi natijalar ko'rsatamiz.

- AGMK bilan bo'lgan o'yinda futbolchilar o'rtasida mushtlasuv sodir bo'ldi. Bunga qanaqa munosabat bildirasiz?

- Futbolda har narsa bo'lib turadi. O'yin baytida barcha futbochlilar asabiylashadi. Shunda raqib jamoa bilan urishib ketishadi. Maydonda to'qnashuvlar bo'lib turadi. Ushbu bahs yakunlanganidan so'ng, Ikrom Aliboev va Abduqaxxor Hojiakbarov do'stona xayrlashishdi.

- Superliga bahslari qiziqarli o'tmoqda. Bu yil chempion kim bo'lishi ham nomalum. Sizningcha "Lokomotiv" bu yilgi chempionatda qanchalik qiyinchiliklarga duch kelmoqda?

- Bu yil superliga bahslari ancha kuchaygan. Juda ham qiziqarli o'yinlar bo'lyapti. Barcha jamoalar kuchaygan. Kim chempion bo'lishi ham nomalum.

- Sizga arab jamoalaridan qiziqishlar yoki takliflar bo'lyaptimi?

- Superliga bahslari endi qizg'in pallaga keldi. OCHL musobaqasining guruh bosqichi ham yakunlanmoqda. Hozircha hech bir jamoadan takliflar bo'lgani yo'q. Ayni damda "Lokomotiv" jamoasi bilan shartnomam bor.

Jahongir Sotvoldiev suhbatlashdi

Sanjar Shoahmedov: "Lokomotiv"ga hech nima bo'lmadi"