Yuzaga kelgan tanaffusdan foydalanib saytimiz muxbirlari PRO-Liga jamoalari futbolchilari bilan intervyular tashkil etishmoqda. Quyida Yaypanning "Turon" jamoasi etakchi futbolchilaridan biri Davron Isaqov bilan tashkil etilgan intervyuni etiboringizga havola etamiz.

- Ayni damda "Turon" jamoasi mashg'ulotlari qay tarzda o'tmoqda?

- Xabaringiz bor, karantin tartiblari kuchaytirilgach, PRO-Liga o'yinlari vaqtincha to'xtalildi. Ushbu davr mobaynida klubimiz murabbilar shtabi bilan uy sharoitida mashg'ulotlarni olib bormoqdamiz. Joriy mavsumdan umidimiz katta, nasib bo'lsa yil yakunida Superliga yo'llanmasini nishonlaymiz.

- PRO-Liga klublari orasida qaysi jamoaning chempionlikka imkoniyatlarini yuqori baholaysiz?

- Yuzaga kelgan tanaffus tufayli ayni damda jamoalarning imkoniyatlarini chamalash qiyin. Qaysidir klubning jismoniy tayyorgarligi yuqori, boshqasida unday emas. Shu sababli hech bir jamoani alohida ajratib ko'rsata olmayman.

- Bugunga qadar PRO-Ligada 3 ta tur uchrashuvlari o'tkazildi. "Xorazm" va "Oq-tepa" mag'lub etildi, safardagi uchrashuvda "Sho'rtan" bilan mag'lubiyat. Shu o'yinlar haqida nimalarni ayta olasiz?

- Har uch o'yinga ham jiddiy tarzda tayyorgarlik ko'rgandik. "Xorazm" va “Oq-tepa" bilan bo'lgan bahslarda o'ylagan rejalarimiz amalga oshdi. Lekin "Sho'rtan"ga qarshi o'yinda tezkor gol qo'yib yuborganimiz hammasini o'zgartirib yubordi. O'yinimizni o'nglab olgunimizga qadar vaqt o'tib ketib qoldi. Umuman aytganda tan olish kerak, "Sho'rtan" yaxshi shakllangan jamoa ekan.

- Pandemiya davrida PRO-Ligani markazlashtirilgan xolda o'tkazish fikriga munosabatingiz qanday?

- O'yinlarni markazlashgan xolda tashkil etilishi bu mavsumning qolgan qismini to'liq o'tkazishga imkon yaratadi. Shuningdek, jamoalar karantin tartiblariga qatiy amal qilishlari taminlanadi, virus yuqish xavfi kamayadi.

- Futbolchi sifatidagi maqsadlaringiz qanday? Bugunga qadar nimalarga erishdingiz, nimalarga endilikda erishmoqchisiz?

- O'tgan 5 yil davomida PRO-Ligada ikki bor chempionlikni qo'lga kiritdim. Nasib bo'lsa kuni kelib Superliga g'olibligini yutishni istayman.

Bekzod Tolibov yozib oldi.

PRO-Liga. Davron Isaqov: "Besh yil ichida PRO-Ligada ikki bor chempion bo'ldim. Endi navbat Superligaga..."