Bilasiz, ertaga - 14 dekabr kuni O'FF yilning eng yaxshilarini taqdirlash marosimini o'tkazadi. Shu bois federatsiyada ish qizg'in. Hamma ertangi marosimga tayyorgarlik ko'rish bilan band. Vaqti tig'iz bo'lishiga qaramay, Omon G'ofurov bilan qisqacha suhbatlashib, bazi savollarga javob olishga muvaffaq bo'ldim. Aytish mumkinki, bu savollar ayni paytda ko'pchilikni qiziqtirayotgan savollardir.
Superligada keyingi yil aniq 12ta jamoa bo'ladimi?
Hammamiz o'rganib qolgan oliy liga keyingi yildan Superliga deb ataladi va musobaqada 12ta jamoa qatnashishidan xabaringiz bor. Lekin ora-sira 14ta jamoa bo'larmish, "Dinamo" bilan "So'g'diyona" ham elitada o'ynarmish degan gaplarni eshitib qolyapmiz. Shu bois Omon G'ofurovdan keyingi yil Superligada aniq 12ta jamoa bo'ladimi degan savolga "Ha" degan javobni oldim.
- "Biz bu haqda e'lon qilib bo'lganmiz, - deydi PFL Bosh direktori. - 2018 yil Superligada 12ta jamoa bo'lishi aniq. 14ta jamoa bo'larmish degan gap-so'zlar esa shunchaki mish-mish xolos".
12ta jamoa kimlar?
Xo'p, 12ta jamoa bo'lishini hal qilib oldik. Lekin ikkinchi savol yuzaga kelyapti: bu jamoalar kimlar? Biz nomma-nom shu-shu klublar o'ynaydi deya olamizmi? Bu haqda Omon G'ofurov shunday dedi: "Hozircha aniq 12ta klub nomini to'liq ayta olmayman, chunki biz barcha klublarga 1 fevralga qadar licenziyadan o'tish muhlatini berganmiz. Licenziyadan kimlar o'tsa, shular Superligada qatnashadi".
Superliga qur'asi qachon bo'ladi?
O'tgan yil 15 dekabr kuni oliy liga-2017 uchun qur'a tashlangandi. Chunki jamoalar turma-tur o'z raqiblarini qancha oldin bilsa, shunga qarab mavsumga hozirlik ko'radi. Viloyatlarga boradigan jamoalar mehmonxona band qilishadi, yo'l chiptalariga buyurtma berishadi deganlaridek.
Lekin Omon G'ofurovning aytishicha, keyingi yil Superliga uchun fevral oyida qur'a tashlanar ekan. Yana o'sha gap, Superligada o'ynaydigan 12ta jamoa nomi rasman ma'lum bo'lganidan so'ng musobaqaga qur'a marosimi o'tkaziladi. Bu juda g'alati yangilik. Balki bu masala keyinroq ko'rib chiqilishi ham mumkin.
Boshqa savollar
Suhbat davomida boshqa savollarga ham javob olgandek bo'ldim. Masalan, Superliga aniq to'rt davrali formatda o'tkazilishi, birinchi ligada 24 yoshgacha chegara hali ko'rib chiqilayotgani, Superliga klublari uchun yillik badal puli 500 million so'm bo'lishi haqiqatdan yiroqligi, birinchi ligada ham aniq 16ta jamoa qatnashishi va boshqalar.
Xullas, PFL tomonlarda mana shunaqa gaplar. Klublar dekabrning ikkinchi yarmidan keyingi mavsumga tayyorgarlik ko'rishni boshlaydilar. Lekin ularning ayrimlari qayerda o'ynashni bilmay turib mashg'ulot o'tkazaveradi. Baribir hamma PFL tomonidan bo'ladigan yangiliklarni kutib yashaydi.
