Taniqli futbolchi 59 yoshni qarshi oldi.

1961 27 mayda tatar oilada dunyoga kelgan Kabaevning bolalik yillari Surxondaryo viloyatining Uzun tumanida o'tdi. Uning otasi Vazix Kabaev o'z vaqtida O'zbekiston kurash federaciyasida faoliyat ko'rsatgan, turli lavozimlarda ishlagandi. Marat esa bir vaqtning o'zida futbol va basketbol bilan birga shug'ullandi. 15 yoshidan Moskvadagi futbol maktablarida turli guruhlarda o'z imkoniyatlarini sinab ko'rgach, 1979 yilda Termizga qaytdi. 1980 yildan boshlab yangi tiklanish jarayonini boshidan kechirayotgan “Paxtakor” respublikamizning turli joylaridan iqtidorlarni yig'ishni boshladi. Marat Kabaev ham Termizning “Avtomobilist” jamoasidan taklif qilindi. 28 sentyabrda Toshkentda Lvovning “Karpati”siga qarshi o'yinda murabbiy Ishtvan Sekech asosiy tarkibga kiritdi. Birinchi golini esa Simferapolning “Tavriya” jamoasiga urdi.

1981 yilda SSSR yoshlar terma jamoasi bilan Franciyadagi turnirda qatnashgach keyingi yillarda SSSR olimpiya terma jamoasiga kiritildi. 1986 yilda bir mavsum birinchi ligada SKA klubida o'ynab “Paxtakor” safiga qaytdi va jamoaning eng yaxshi to'prurari bo'ldi. 1989 yilda ukrainalik mutaxassis Evgeniy Kecherevskiyning qiziqishlari doirasiga tushib qoldi. Natijada Igor Shkvirin bilan birga “Dnepr”ga ko'chib o'tdi. Lekin, kutilmagan mashg'ulotlarda orttirib olingan jaroxat faoliyatini bir maromida davom ettirishga to'sqinlik qildi. Buning oqibatida ko'p bor jamoa almashtirishiga to'g'ri keldi. “Umid”, “Traktor”, “Navbahor”, “Qaysar” klublarida qisqa vaqt harakat qildi va Samarqandning “Dinamo” jamoasida butsalarini mixga ildi.

Murabbiylik faoliyatini Toshkentning “Traktor” klubida boshladi va uch mavsum davomida Vadim Abramovga ko'maklashdi Bir necha yil mobaynida “Chig'atoy” futbol maktabida yoshlarga dars berdi. Igor Shkvirin 2008 yilda “Olmaliq” jamoasining boshqaruvini o'z qo'liga olgach do'stini o'rinbosarlar jamoasiga murabbiyligiga taklif qildi. 2009 yilda esa Ahmad Ubaydullaevga Misrda o'tgan kichik Jahon chempionatida assistentlik qildi. Futbolimiz rahbarlari uning tajribasini inobatga olib 1991 yilda tug'ilgan futbolchilardan iborat yoshlar terma jamoasini ishonib topshirdi. O'sha jamoada Akbar Ismatullaev, Dilshod Jo'raev, Temurxo'ja Abduxoliqov, Egor Krimeclar o'ynagandi. Lekin, 2010 yilgi Osiyo chempionatida terma jamoa chorak finldan ortga qaytishga majbur bo'ldi. 2011 yilda “Qizilqum” jamoasidagi ishi bilan O'zbekistondagi faoliyatiga yakun yasadi. 2012-2015 yillar oralig'ida “Rubin”da Qurbon Berdievga selekcioner murabbiy sifatida yordamlashdi. Sardor Azmunning porlashida bilsangiz Kabaevni ham o'rni bor. Azmunni selekciya natijasida Qozonga aynan Kabaev olib kelgandi.

Saytimiz ijodkorlari nomidan Marat Kabaev sog'lik va salomatlik tilab qolamiz.

“Paxtakor”da to'p tepgan, Surxondaryo futbolining yulduzi Marat Kabaev 59 yoshga to'ldi