So'nggi turda Olmaliqda AGMK mehmoni bo'lgan "bo'rilar" hal qiluvchi pallada so'nggi daqiqalarda Javohir Qahramonovning penaltidan urgan goli amalda jamoaning ikkinchi o'rinni olishini taminladi. Yaqinda mahoratli yarim himoyachi bilan suhbatlashdik.

- "So'g'diyona" 1992 yildan so'ng oradan ancha vaqt o'tgach kumush medallarga ega chiqdi. Jamoa bunga avvalgi mavsumlarda ham juda yaqin kelgan edi. Biroq bir nechta ochkolar etmay qolgandi. Dastlab mana shu kumush medalgacha bosib o'tilgan yo'l haqida fikrlaringiz bilan o'rtoqlashsangiz?

- Avvalambor etibor uchun tashakkur. Joriy yilgi Superliga bahslari qiziqarli kechdi, deb o'ylayman. Ko'rgan bo'lsangiz medallar uchun kurash oxirgi turgacha davom etdi. Chempionlikdan tashqari qolgan o'rinlarga intriga yaxshigina kechdi. "So'g'diyona" uchun omadi keldi. Buni baralla ayta olaman. Bu yo'lda barcha birdek harakat qildi. Xudoga shukur yakunda ikkinchi o'rinni qo'lga kiritdik.

- 2019 yil "Bunyodkor" bilan bronza va OCHL yo'llanmasini qo'lga kiritdingiz. "So'g'diyona" bilan esa ikkinchi o'rin. Lekin OCHL masalasi hali ochiq. Qaysi biri siz uchun afzal?

- Oldimizga kuchli uchlikka kirish vazifasi qo'yilgandi. Biz buni uddaladik. Qo'lga kiritilgan har bir sovrinni o'ziga yarasha zavqi bor. Shu bois ikkisi ham men uchun muhim.

- Bu yil "So'g'diyona" uchun juda muhim gollarni urdingiz. Ayniqsa so'nggi turda AGMK bilan bahsdagi penalti tepish masuliyatini olishda nima ishonch va kuch berdi?

- Jamoamga foydam tekkanidan xursandman. Superligada 26-turda urgan golimga kelsak, o'sha kuni qizimning tug'ilgan kuni edi. Ichimda qandaydir ishonch sezdim. Agarda AGMK darvozasiga yo'l topa olsam, qizimga bag'ishlayman, degan niyatim boridi. Niyatim amalga oshdi.

- "So'g'diyona"ning mavsum davomida ko'rsatgan o'yini ko'p bor tanqidga uchradi. Ulug'bek Baqoev shunday pallada qanday ish tutdi?

- Bizni gapirishyaptimi, demak to'g'ri yo'ldamiz. Ulug'bek Baqoev shunday gaplarni aytgandi. Ortiqcha narsalarga etibor qilganimiz yo'q. Maqsadimiz sovrinli o'rinlarni egallash ekanligi bois diqqatimiz bir joyga qaratilgandi.

- Endilikda futbol ommasining jamoaga nisbatan qarashi o'zgaradi. Keyingi mavsumda ko'p narsa kutishadi. Bunga tayyormisizlar?

- Ushbu savolingiz javobini vaqt hukmiga topshirgan maqul. Keyingi yil jamoa oldiga qanday maqsadlar qo'yilishiga ham ko'p narsa bog'liq. Shu bois hozircha hech narsa, deya olmayman.

- Klub o'z bazasiga ega bo'lganini hisobga olsak, qishki yig'inlarning ilk kunlari Jizzaxda o'tkazilsa kerak. Chunki avvalgi yillarda "So'g'diyona" chempionat boshlangunicha Toshkentda bo'lardi...

- Yo'q, menimcha Toshkentda tashkillashtirilsa kerak. Superliganing barcha jamoalari Toshkentda yig'iladi. O'rtoqlik uchrashuvlari uchun ham poytaxt bir tomondan qulay. Lekin Jizzaxda qolishim hali aniq emas.

Abdulaziz Iskandarov

"O'sha kuni ichimda qandaydir ishonch sezdim" - Javohir Qahramonov