Klub tasarrufidagi barcha jamoalar o'z sohalarida yuksak yutuqlarga erishib, muxlislarni mamnun etdi. Jumladan, OKMK FKning asosiy jamoasi muvaffaqiyatli ishtirok etgan musobaqalar bilan bir qatorda, U-21 jamoasi, futzal jamoasi, ayollar jamoasi (OKMK-Women) va futbol akademiyasi yoshlari ham mavsum davomida o'z mahoratlarini namoyish qildi. Ularning qo'lga kiritgan natijalari klubning kelajakka bo'lgan ishonchini yanada mustahkamlamoqda.

Shu munosabat bilan, yil davomida qo'lga kiritilgan muvaffaqiyatlarni tahlil qilish, jamoalarning erishgan yutuqlarini baholash hamda kelgusi mavsum uchun rejalar bilan o'rtoqlashish maqsadida hisobot konferenciyasi o'tkaziladi. Ushbu tadbirda yuqorida sanab o'tilgan jamoalarning rahbarlari, murabbiylari va masullari ishtirok etib, o'zlarining hisobotlari bilan chiqish qiladi.

Konferenciya ertaga, 26 dekabr kuni soat 15:00 da Olmaliq shahridagi "Metallurg" madaniyat saroyining katta zalida boshlanishi rejalashtirilgan. Unda jamoatchilik vakillari, jurnalistlar va muxlislar klub faoliyati haqida to'liq malumot olish, shuningdek, o'zlarini qiziqtirgan savollarni berish imkoniyatiga ega bo'ladilar.

Ochiq muloqot tarzida o'tadigan ushbu tadbirda klubning kelajakdagi rejalariga oid qiziqarli malumotlar ham elon qilinishi kutilmoqda. Shu sababli barcha OAV vakillari, klubimizning sodiq muxlislari va futbol ishqibozlarini ushbu muhim tadbirda ishtirok etishga chorlab qolamiz!

P.S. Konferenciya boshlanish vaqtida o'zgarishlar yuzaga keladigan bo'lsa, bu haqda qo'shimcha malumot beriladi. Tadbirga oid yangiliklarni klubning rasmiy sahifalari orqali kuzatib borishingiz mumkin.

OKMK OAV vakillari va muxlislarni hisobot konferenciyasiga taklif etmoqda