- Mana, futzalda ham o'zingizni sinab ko'rdingiz. Xo'sh, taassurotlar qanday?

- Albatta, avval ham zalda o'ynab ko'rganman. Lekin bunga ancha bo'lgandi. Fikrimcha, futzal baribir, futbolning bir turi. To'g'ri, farq katta. Futzalda ko'proq harakat qilishingiz kerak. Xullas, jismoniy jihatdan juda kuchli bo'lish talab etiladi.

- Bilamizki, futzal terma jamoasi safida ham do'stlaringiz ko'p...

- Albatta. Axir futzal va futbol deyarli bitta sport turi. Xullas, futzalchilar orasida do'stlarim etarli.

- 2015 yil ham nihoyasiga etib bormoqda. Mavsum-2015 shaxsan sizning hayotingizda qanday iz qoldirdi?

- 2015 yil men uchun omadli kechdi, deya olaman. Klub miqyosida ham, terma jamoa bilan ham ijobiy natijalarga erishdik. Deylik, milliy jamoamiz JCH-2018 saralashida ketma-ket 5ta g'alabaga erishdi. Bu bilan Osiyo chempionatiga chiqish vazifasini uddaladik. Ilohim, 2016 yilgi futbol mavsumi ham ijobiy natijalarga boy bo'lib, oldimizga qo'yilgan maqsadlarga erishaylik. Mart oyida jamoamizning saralash bosqichidan o'rin olgan so'nggi 2ta uchrashuvi bor. Tabiiyki, Filippin va Bahrayn termalariga qarshi kechadigan o'yinlarda ham muxlislarni chiroyli g'alabalar bilan xushnud etishga harakat qilamiz.

- Klubingiz - Krasnodar ELda guruh g'olibi sifatida pley-off bosqichiga yo'llanma oldi. Kvartetda Dortmund Borussiyasi ishtirok etganligini inobatga olsak, bunday natijani kutganmidingiz?

- Endi har qanday holatda ham, istalgan turnirda baribir, aniq maqsadlarni ko'zlaysiz. Xoh ichki chempionat bo'lsin, xoh xalqaro turnir - Krasnodar o'z oldiga oliy vazifalarni qo'yadi. Shundan kelib chiqib aytsam, biz ko'zlagan maqsadga etdik. Guruh bosqichi o'yinlarini darhaqiqat, ko'tarinki kayfiyatda o'tkazdik. Shubhasiz, Borussiya kuchli jamoa. Tabiiyki, dortmundliklar ustidan qozonilgan g'alaba Krasnodar uchun tarixiy ahamiyatga ega. Aslida Dortmundda ham yomon o'ynamadik. O'sha kuni mezbonlarga shunchaki, omad kulib boqdi va ular so'nggi daqiqalarda urilgan gollar evaziga g'alabani ilib ketishdi. Menimcha, kuchli intilish va ishtiyoq evaziga guruh g'olibi bo'ldik.

- Qura natijasiga ko'ra, endi Chexiyaning Sparta klubi bilan to'qnash kelasizlar...

- Evropa Ligasining ushbu bosqichida kuchsiz jamoaning o'zi yo'q. Axir guruhlarda dastlabki o'rinlarni egallashgan klublar 1|16 final bosqichiga yo'llanma olishdi. Ushbu raund uchrashuvlari fevral oyida o'tkaziladi. Unga qadar bizda tayyorgarlik ko'rish uchun vaqt bor. Garchi Sparta nisbatan engilroq raqibdek ko'rinsada, har ikki o'yin biz uchun oson kechmasligi aniq. Sparta shu bosqichga etib kelgan ekan, demak, u kuchsiz jamoa emas.

- Afsuski, Krasnodar Rossiya chempionatida bir maromda o'yin ko'rsatolmayapti.

- Rossiya premer-ligasida autsayder ham kuchli klubdan ochko tortib olishi mumkinligini isbotlash shart emasdir. Chempionlik uchun kurashayotgan CSKA va Zenit klublari ham turnir jadvalining quyi qismida borayotgan raqiblarga hattoki, o'z maydonlarida imkoniyatni boy berishdi. Qisqasi, raqobat kuchli. Qolaversa, notekis o'yin ko'rsatishimizga charchoq alomatlari ham tasir qildi, deb o'ylayman. Yaxshiyamki, so'nggi uchrashuvlarda qo'lga kiritilgan ochkolar hisobiga turnir jadvalidagi holatimizni nisbatan to'g'rilab oldik. Oldinda ikkinchi davra uchrashuvlari turibdi. Nasib qilsa, chempionatda ham o'z oldimizga qo'yilgan vazifani bajaramiz.

- Avval ham bu haqda o'zaro gaplashganmiz: Rossiya premer-ligasi Odil Ahmedov uchun so'nggi bekat bo'lib qolmasligi kerak. Endigi rejalar qanday?

- Krasnodar bilan shartnomam bor. Shu sababli, boshqa jamoalar haqida hozircha o'ylamayapman. Lekin agar taklif tushsa, uni ko'rib chiqaman, albatta. Ha, qo'shilaman, Rossiya premer-ligasi men uchun so'nggi manzil bo'lib qolmasligi kerak.

- O'zbekiston olimpiya terma jamoasi yanvar oyida Qatarda o'tkaziladigan Osiyo chempionatida ishtirok etadi. Shu paytgacha vakillarimiz Olimpiada final bosqichida qatnashishmagan. Bugungi tarkib, murabbiylar shtabini nazarda tutsak, ushbu jamoaning imkoniyatlari juda yuqori. Shaxsan siz olimpiyachilarimiz imkoniyatlarini qanday baholaysiz?

- O'ylaymanki, yigitlar bu yo'lda bor imkoniyatlarini ishga solib, Rio-2016 yo'llanmasini qo'lga kiritishadi. Darhaqiqat, tarkib kuchli. Mana, yangi murabbiylar shtabi ish boshladi. Guruhda Janubiy Koreya va Iroq termalarining asosiy raqib bo'lishlari turgan gap. Fursatdan foydalanib, olimpiya jamoamizga omad tilayman. Shuningdek, milliy jamoamizga ham. Yuqorida aytganimdek, kelasi yilning mart oyida Bahrayn va Filippin termalariga qarshi 2ta muhim uchrashuvimiz bor. Bu o'yinlarda muxlislarimiz bizni yaxshi qo'llab-quvvatlashsa, albatta, chiroyli g'alabalarga erishamiz.

- Yangi yil ostonasida turibmiz. Xalqimiz, futbol muxlislariga tilaklaringiz...

- 2016 yil barchamizga omad olib kelsin. Eng avvalo, yurtimiz tinch, osmonimiz musaffo bo'lsin. Yangi yilda ham yaxshi natijalarga erishib, muxlislarni xushnud qilaylik.

"Interfutbol" gazetasi

Odil Ahmedov futzal, yil yakunlari va Krasnodar haqida