Osiyo chempionlar Ligasining 2023/2024 yilgi mavsumdan etiboran kuz-bahor tizimiga o'tishi ancha oldin aytilgandi. Yana bir yangilik shuki, kelasi yildan boshlab OCHL bahslarida har klub 5+1 formatidagi legionerlar xizmatidan foydalanishi mumkin bo'ladi. Bungacha bir necha yildan beri 3+1 ga amal qilib kelinayotgandi.

Bu yangilik ko'proq arab klublariga moydek yoqib tushgan bo'lishi aniq. Chunki Osiyoda legionerlar xizmatidan ko'proq arab jamoalari foydalanishni xush ko'radi. Bo'lib ham ular saviyali legionerlarga etibor qaratadi.

Ayniqsa, Saudiya Arabistoni, Qatar, BAA klublarida pul ko'p va ular istalgancha legioner transfer qilish imkoniyatiga ega. Eron bu borada etti o'lchab bir kesadigan futbol jamoatchiligiga kiradi va ular qimmat o'yinchilarga ko'p ham oshiqmaydi.

Legionerlar limitining oshishi o'zbek klublari uchun foydami? Hozirdan aniq bir gap aytish qiyin-u, lekin bu jamoalarimizning OCHLdagi munosib ishtirokini yanada qiyinlashtirsa kerak. Chunki limit oshgani bilan biz shunga yarasha kuchli legionerlarni jalb eta olmaymiz.

Buning uchun bizda katta mablag' ham yo'q. OCHL guruh o'yinlarini G'arb mintaqasida o'tkazishimizni inobatga olsak, arab klublari yanada kuchayadigan bir payt biz ular oldida ojizroq bo'lib qolamiz. Chunki bizga kelayotgan "vich"lar nimanidir qoyil qilishiga ishonish qiyin.

Barsa Bloger.

OCHLda legionerlar limiti oshishi ko'proq arablar foydasiga ishlaydi