"B" guruhida "Paxtakor" va "Al Hilol" jamoalari o'zaro kurash olib borishadi. Tomonlarning 3 kun oldin 3-tur doirasidagi bahsida saudiyaliklar so'nggi daqiqadagi gol evaziga g'alaba qozonishgandi.

Ertangi bellashuvni boshqarib boradigan hakamlar brigadasi malum bo'ldi. Demak, uchrashuv bosh hakami bahraynlik Navaf Shukrulla. Ha, siz uni juda yaxshi taniysiz. Unga qanotlarda hamyurtlari Muhammad Salmon va Abdulla Solih Alrovaimi yordamlashadi. Hakamlar nazoratchisi esa ko'pchilik yaxshi tanish bo'lgan malayziyalik Subhiddin Mohd Solih.

OCHL

4-tur, "B" guruhi

"Paxtakor" - "Al Hilol"

Bosh hakam: Navaf Shukrulla Abdulla G'ayyat (Bahrayn)

Qanot hakamlar: Muhammad Jafar Muhammad Salmon (Bahrayn), Abdulla Solih Alrovaimi Abdulla Mohsen (Bahrayn).

Zaxira hakami: Krishanta Dilan Perera Hettikankanamge (Shri-Lanka).

Nazoratchi: Subhiddin Bin Mohd Solih (Malayziya).

Qiziq malumot: Navaf Shukrulla ushbu jamoalarning OCHL-2016 2-turi doirasida Ar-Riyoddagi o'yinini boshqargan. O'shanda saudiyaliklar 4:1 hisobida g'alaba qozonishgan. 4 yil oldin bo'lib o'tgan o'sha o'yinda "sherlar"ning yagona golini kiritgan Igor Sergeev hozir ham tarkibda. "Hilol" safida esa o'sha yirik g'alabada ikkita golga assistentlik qilgan Muhammad Al Shalhub OCHLning markazlashgan o'yinlari uchun "zayavka"ga kiritilgan. Lekin, u yaqindagina futbol bilan xayrlashgan edi. Tugatgan bo'lsa nega "zayavka" qilgan degan tabiiy savol tug'ilishi mumkin. Balki, jamoa OCHLni yana yutgan taqdirda klub afsonasi kubokni ko'tarishini xohlab shunday qilgandir. Har holda Al Shalhub "Hilol"ning eng katta afsonasi hisoblanadi.

Bundan tashqari, janob Navaf "Paxtakor"ning xalqaro maydondagi yana bir o'yinini boshqargan. OCHL-2012 4-turi doirasida Dohada "Al Arabi"ga qarshi bellashuvda toshkentliklar 1:0 hisobida g'alaba qozonishgan. 8 yil oldingi o'sha to'qnashuvda asosiy tarkibda tushgan Egor Krimec hozirda jamoa sardori hisoblanadi.

Eslatib o'tamiz, "Paxtakor" - "Al Hilol" uchrashuvi bugun, 17 sentyabr kuni mahalliy vaqt bilan 21:00 (Toshkent vaqti bilan 23:00)da start oladi. Bahs "Al Janub" stadionida bo'lib o'tadi.

OCHL. "Paxtakor" - "Al Hilol". O'yinni qaysi hakam boshqarishi malum