Xo'sh bu borada klub rahbarining fikri qanday? “Sho'rtan”ning yangi mavsumga tayyorgarligi qay tarzda kechmoqda? Shu va boshqa savollarga javob topish maqsadida “Sho'rtan” bosh direktori Oblayor Rasulovga murojaat qildik.

- Oblayor aka, Sizdan avvalo Aleksandr Volkov bilan yuzaga kelgan voqea haqida so'ramoqchi edim. ”Sho'rtan”da uzoq vaqt bo'lmagan bu murabbiyning ketib qolishiga nima sabab bo'lganini to'g'risi bizga Sizdan boshqa kishi aniq aytib bera olmasa kerak. Shu bois bu borada o'zingizga murojaat qilgandik?

- Hammasini bir boshidan boshlaydigan bo'lsak, gap shundaki, Aleksandr Volkovni jamoaga olib kelishdan oldin undan tashqari yana bir qator nomzodlar bor edi. Ammo biz hammasini o'ylab ko'rgach, ushbu mutaxassisga aniq taklif bilan chiqdik. Volkov bilan uchrashib, hamkorlik qilishi taklifini berganimda, u bundan xursand ekanligini bildirdi va rozilik berdi. Keyin ertasi kuni murabbiy G'uzorga etib bordi va klub qarorgohida yig'ilish o'tkazib, yangi bosh murabbiy sifatida tanishtirdik. Co'ngra Volkov ishga kirishdi 3-4 kun faoliyat yuritdi. Adashmasam 5-kuniga borib, telefon qildida to'satdan “Sho'rtan”dan ketmoqchi ekanligini aytib qoldi. Klubda ishlashni istamayotgan insonni majburlab ushlab qolishni maqul topmadim va murabbiyning qarorini qo'llab-quvvatlagan xolda, bir-birimizga omad tiladik. Aleksandr Volkov ungacha “Navbahor” variantini naqd qilib qo'ygan ekan. Shu bois biz bilan xayrlashiboq, tezda namanganliklar safiga borib qo'shildi. Bor gap shu.

- Aytingchi Volkovning ketib qolishidan so'ng aynan uning nomzodida to'xtalganingizdan afsuslandingizmi?

- Yo'q, afsuslanmadim. Lekin murabbiyni hamma ham yaxshi niyatda olib keladi. Volkovni biz oliy liga jamoasiga taklif etgandik. Lekin u keyinchalik shunday qarorga keldi.

- Keyin boshqaruv posti yana Zoir To'raqulovga ishonib topshirildi.

- Ha, shunday. To'raqulov mahalliy murabbiy sanaladi. Boy tajribaga ega. Ko'p yillardan buyon oliy ligada faoliyat yuritib kelmoqda. Bu yil asosiy etiborni qashqadaryolik futbolchilarga qaratganmiz. Ushbu mutaxassisga ishonishimizning boisi ham mahalliy yigitlarning imkoniyatini yaxshi biladi.

- Olib borilayotgan selekciya ishlaridan ko'nglingiz to'lmoqdami?

- Ha, qoniqish xosil qilyapmiz. Yuqorida aytganimdek, bu yil asosiy urg'uni mahalliy futbolchilarga qaratganmiz. Murabbiylar shtabi bilan hamfikr bo'lgan xolda, futbolchilarni ko'rib chiqmoqdamiz. Mana yaqinda o'g'lim Sardorni ham jamoaga qaytardik.

- So'nggi yillarni “Metallurg”da o'tkazib kelgan Sardor Rasulovnimi?

- Ha. Sardor mening ikkinchi o'g'lim bo'ladi. Akasi Komiljon Rasulov o'tgan yili o'zini hakamlikda sinab ko'rdi. “Metallurg” ustozi Rustam aka Mirsodiqovga minnatdorchilik bildirgan xolda, u kishidan ruhsat olib, Sardorni “Sho'rtan”ga jalb etdik. Endi u yana jamoamizga yordam beradi.

- O'tgan yili klubda moddiy qiyinchiliklar yuzaga kelgani bor gap. Aytingchi qarzdorliklar bartaraf etildimi yoki qanchadir miqdorda qolganmi?

- Yashirmayman, qarzdorliklar qisman qolgan. Lekin chempionat startiga qadar hamma bilan to'liq hisob-kitob qilinadi.

Islombek Rustambekov.

Oblayor Rasulov: “Volkovning ketib qolishi meni hayron qoldirdi”