Futbolchi chempionatning yangi ishtirokchisi – “Svadhinata Krira Sangha” klubi bilan kelishuvga erishdi. Xo'sh, yangi jamoasiga qay tariqa yo'l olgani va boshqa maqsadlar borasida Mavlonov fikrlariga quloq tutdik.

“Bangladeshga kelganimga ikki kun bo'ldi. Bu erga yo'l olishim agentim orqali amalga oshdi. Aslida Bangladesh chempionatiga kelish niyatim yo'q edi. Yil boshid men boshqa jamoa bilan kelishuvga erishgandim. Biroq mamlakatda yuzaga kelgan karantin qoidalari tufayli deyarli bir yil futbol o'ynamadim. Shuning uchun ham Bangladesh Premer-ligasining yangi ishtirokchisi bilan olti oylik shartnomaga imzo chekdim.

Shartnomam muddatini olti oyga tuzganimga asosiy sabab, sport formamni tiklab olish asosiy vazifa hisoblanadi. Yuqorida aytganimdek, bir yilga yaqin vaqt davomida o'ynamadim. Bu esa albatta katta yo'qotish hisoblanadi. Klub menga bir yillik bitim taklif qildi. Biroq men olti oylik shartnomani tanladim.

Bu erga kelishdan avvalroq Otabek Valijonov bilan o'zaro maslahatlashdim. U kishi qaerda bo'lmasa ham, sport formamni tiklashim lozimligini maslahat berdi.

“Svadhinata Krira Sangha” klubi yangi mavsumda o'z oldiga yuqori maqsadlargi qo'yayotgani rost. Chunki ular meni va boshqa legionerlarni juda yaxshi kutib oldi va barcha sharoitlarni yaratib bermoqda. Mendan tashqari, jamoada eronlik, bosniyalik, polshalik legionerlar ham bor.

Bruney mamlakati klubi bilan deyarli kelishuvga erishgandik. Shartnoma imzolash arafasida edim. Ammo Bruneyda karantin elon qilindi va futbol musobaqalar bekor bo'ldi. Shu sababli men ham uyga qaytishga majbur bo'lgandim", - dedi Mavlonov.

Nodir Mavlonov: “Sport formamni tiklash uchun ham Bangladesh klubini tanladim”