Klub Superligaga qaytganiga qaramay maqsadni yuqori qo'ygan va shu yo'lda tarkibni kuchaytirish ishlarini jadallik bilan davom ettiryapti. Xususan "Buxoro" yaqinda o'z safiga Superliganing o'tgan yilgi eng yaxshi assistenti Aleksandar Stanislavlevichni qo'shib olganini elon qildi. Serbiyalik yarim himoyachi yurtimizdagi debyut mavsumidayoq ko'pchilikda iliq taassurot qoldirdi.

- Siz uchun qaysi biri muhimroq edi, "Qizilqum" bilan yuqori o'rinni egallash yoki individual natija?

- Birinchi navbatda ajoyib yil uchun "Qizilqum"ga rahmat aytaman. Ishonch bildirishgani uchun tashakkurimni izhor qilaman. Natija xursand qiladi. Jamoamiz 5 o'rinni egalladi, bu etarli emasdi.

- Jamoadan ketganlardan "Qizilqum" haqida iliq fikrlar ko'p yangramayapti. Aslida u erda qanday jamoa yig'ilgandi? Ichki muhit bilan bog'liq kelishmovchiliklar yuz bermadimi?

- Biz faqat bunday tarkib bilan sovrinli o'rinlarni egallay olmaganimizdan afsuslandik. O'zimda ham shunday kechinma o'tdi. Sifatli ijrochilarga ega edik.

- "Nasaf" bosh murabbiyi sizni o'z jamoasida ko'rishni istab aloqaga chiqqanligi haqida eshitdik. Xo'sh, Qarshi jamoasiga o'tishingiz nima uchun amalga oshmadi?

- Ha, aloqa bo'ldi. Lekin o'zaro tilimizni topa olmadik. "Buxoro"ga kelganimdan xursandman. Endi kelajakda nima bo'lishi faqat xudoga ayon.

- Menimcha "Buxoro" varianti kutilmaganda bo'ldi? Chunki sizga qiziqish bildirgan jamoalar orasida bu klub yo'q edi...

- "Buxoro"dan taklif kutilmaganda keldi. Murabbiy bilan birinchi suhbatdan so'ng u erga borishimni tushunib etdim. Murabbiy sizning kelajagingiz bilan shaxsan o'zi shug'ullansa, futbolchi uchun bundan yaxshi narsa yo'q. Uning ishonchini oqlashga harakat qilaman.

- Hakim Fuzaylov bilan ilk suhbat haqida...

- Murabbiy o'z jamoasida ko'rishni qanchalik istayotganini ko'rdim. Shu omil ham meni "Buxoro" sari etakladi.

- "Buxoro" Superligada kutilmagan natija ko'rsatishi mumkinmi?

- Bizda yaxshi jamoa bor. Hammasini maydonda isbotlashimiz kerak. Ko'p narsaga erisha olishimizga ishonaman. "Buxoro"ga kelgan ilk kunimdanoq kuchli jamoa borligini sezdim.

Nima uchun "Nasaf"ni tanlamadim? "Buxoro"ning kutilmagan taklifi yoxud "Qizilqum"da faqat bir narsadan afsusdamiz" - Aleksandar Stanislavlevich