Championat.asia sayti talqiniga ko'ra, 25-turning eng yaxshi darvozaboni – Valijon Rahimov ("Bunyodkor")

"Bunyodkor" bu turda Namanganda "Navbahor" mehmoni bo'lib, 2:0 hisobida zafar quchdi. G'alabada Rahimovning o'rni beqiyos, chunki u 28-daqiqada penaltini bartaraf etdi va bu "qaldirg'ochlar"ga qo'shimcha kuch bag'ishladi. Bundan tashqari, toshkentliklar posboni bahs mobaynida qator vaziyatlarda o'zini ko'rsatdi. Championat.asia ijodiy guruhi ortiqcha muhokamalarsiz aynan uni eng yaxshi deb topdi.

Championat.asia sayti talqinida 25-turning eng yaxshi murabbiyi – Ilyos Zeytullaev ("Bunyodkor")

Yuqorida takidlaganimizdek, ortda qolgan turda "Bunyodkor" safarda "Navbahor"ni mag'lub etdi (2:0). Bunda Ilyos Zeytullaevning hissasi katta. Uchrashuvda aynan uning taktik ishlanmalari qo'l keldi. Shunday qilib, Championat.asia sayti 43 yoshli mutaxassisni turning eng yaxshi murabbiyi sifatida etirof etdi.

Championat.asia sayti talqiniga ko'ra, 25-turning eng yaxshi futbolchisi – Imeda Ashortia ("Bunyodkor")

"Bunyodkor"ning "Navbahor" ustidan qozongan g'alabasida katta sahnaga chiqqan futbolchi aynan Imeda Ashortia edi. U uchrashuv mobaynida 2 ta gol urdi va bir qator xavfli vaziyatlar yaratdi. Gruziyalik hujumchi to almashtirilguncha – 87-daqiqagacha tinim bilmadi. Shu tariqa, Championat.asia sayti xodimlari bir qancha nomzodlar orasidan aynan Imedani tanladi va tur futbolchisi deya elon qildi.

Championat.asia sayti talqinida 25-turning eng chiroyli goli muallifi – Usmonali Ismonaliev ("Andijon")

"Andijon" – "Sho'rtan" bahsida shunchaki "otishma" yuzaga keldi va mezbonlar 4:3 hisobidagi g'alabani tantana qildi. Uchrashuvda Usmonali Ismonaliev dublni rasmiylashtirdi. Andijonliklar azosining 54-daqiqada urgan ikkinchi goli juda chiroyli chiqdi. U Abdurahmon Komilovning qanotdan oshirib bergan to'pini to'xtatmasdan darvozaga joylab qo'ydi. Shunday qilib, mohirona zarbasi orqali darvozani ishg'ol qilgan Ismonaliev tur goli muallifi sifatida etrof qilindi.

MTJ sobiq darvozaboni, mehmonda zafar quchgan murabbiy, dublga erishgan hujumchi - Superligada 25-turning eng yaxshilari