"Қизиқарли ўйин кутаётгандик. Албатта, қизиқарли ўйин бўлди. "Андижон"га қарши ўйнаш қийин, лекин бундай атмосферада футбол ўйнаш ёқимли. Шуни таъкидлаб ўтишим керакки, йигитлар ўз вазифаларини тўғри бажаришди. Айниқса биринчи бўлимда. Иккинчи бўлимнинг сўнгги 20 дақиқасида ҳисобни ушлаб қолишга ҳаракат қилдик. Футбол эса 90 дақиқа ўйналади. Ғалаба қозонганимиздан хурсандмиз", - дея гап бошлади Миржалол Қосимов.
- Иккинчи бўлимда Шаҳзод Тоировни майдонда кўрдик. Тоировни ҳисобни сақлаб қолиш учун майдонга туширдингизми?
- Албатта. "Андижон" узун паслар орқали ўйнайди ва бўйи баланд футболчилари бор. Охирги дақиқаларни уч нафар марказий ҳимоячи билан ўтказдик. Сўнгги дақиқаларда ўз дарвозамизга жуда яқин ўйнадик. Унга қадар эса жуда яхши вазиятларга эга бўлдик.
- Япониялик легионерлар сўнгги вақтларда асосий таркибда ўйнамай қўйди. Бунинг сабаби нимада?
- Бизда иккита япониялик футболчи бор. Биринчидан, бу ротация. Арихиро кўп ўйнаётган эди. Шунингдек, икки нафар таянч ярим ҳимоячиси билан ўйнадик. Бугун очиқ футбол ўйнаб бўлмасди. Энди кейинги учрашувга тайёргарлик кўриш керак. Тақвим жуда ҳам зич. Жисмонан тезроқ тикланиб олишимиз керак.
